Shqipëria fitoi 2-1 ndaj San Marinos, por paraqitja e kuqezinjve nuk e kënaqi trajnerin Rolando Maran. Tekniku italian pranoi se skuadra e tij nuk zhvilloi ndeshjen që kishte përgatitur, edhe pse në fund arriti të siguronte tri pikët.
“Nuk më pëlqeu paraqitja e skuadrës, por e rëndësishme është që morëm tri pikët”, deklaroi Maran pas përfundimit të takimit.
“Menduam se e kishim siguruar rezultatin”
Trajneri kuqezi u ndal veçanërisht te rastet e humbura gjatë pjesës së parë dhe rënia e ritmit pas pushimit. Sipas tij, Shqipëria kishte mundësi të mjaftueshme për ta mbyllur ndeshjen shumë më herët.
“Në pjesën e dytë pati një ulje të ritmit. Kishim mundësi për të shënuar më shumë gola në pjesën e parë. Ndonjëherë, ndaj skuadrave të tilla, ndodh që të ngadalësosh lojën sepse mendon se e ke siguruar rezultatin”, shpjegoi italiani.
Maran pranoi se kuqezinjtë krijuan dhe goditën shumë herë drejt portës, por nuk treguan efikasitetin e duhur. Kjo i dha mundësi San Marinos të qëndronte në lojë dhe të gjente golin e barazimit.
“Kishim shumë raste dhe shumë gjuajtje, por nuk arritëm t’i konkretizonim. E ulëm përqendrimin”, shtoi ai.
Pse Daku u aktivizua me vonesë
Një nga zgjedhjet që tërhoqi vëmendjen ishte aktivizimi i vonë i Mirlind Dakut. Maran tregoi se stafi teknik priti që ndeshja të hapej dhe të krijoheshin hapësira më të përshtatshme për karakteristikat e sulmuesit.
“E menduam pak më vonë ndryshimin për Dakun. Kur ritmi u rrit, u krijuan më shumë hapësira për të dhe menduam se ai ishte çasti i duhur për ta aktivizuar”, deklaroi trajneri.
Muçi kishte probleme fizike
Maran sqaroi edhe zëvendësimin e Ernest Muçit. Largimi i tij nga fusha nuk ishte një zgjedhje taktike, por u diktua nga gjendja fizike e futbollistit.
“Muçi nuk mund ta vazhdonte ndeshjen, sepse kishte probleme fizike”, tha shkurt trajneri.
Në fund, Maran riktheu vëmendjen te situata në Grupin C1. Ai kujtoi se pozitat e Shqipërisë mund të ishin shumë më të favorshme nëse kuqezinjtë do të kishin marrë tri pikët edhe në Helsinki.
“Nuk duhet të harrojmë se, nëse do të kishim fituar në Finlandë, mund t’i kishim mbyllur llogaritë në grup”, përfundoi Maran.




