Rolando Maran e ka cilësuar të pamerituar humbjen 2-1 të Shqipërisë ndaj Finlandës. Trajneri kuqezi vlerësoi paraqitjen e skuadrës, sidomos reagimin pas kartonit të kuq të Etrit Berishës.
Sipas teknikut italian, Finlanda nuk krijoi raste të pastra nga loja, por arriti të përmbyste rezultatin nëpërmjet dy goditjeve të dënimit.
“Deri në momentin e golit të tyre, në fushë ishte vetëm një skuadër. Edhe më pas krijuam më shumë raste dhe nuk i lejuam të godisnin portën nga loja. Është e pabesueshme të humbësh një ndeshje të tillë”, deklaroi Maran.
“Meritonim rezultat pozitiv”
Trajneri theksoi se Shqipëria ruajti organizimin dhe rrezikshmërinë edhe pse luajti për pjesën më të madhe të takimit në inferioritet numerik.
“U ndëshkuam nga dy goditje dënimi dhe kjo na penalizoi shumë. Edhe me dhjetë lojtarë zhvilluam një ndeshje të madhe. Ekipi meritonte pa diskutim të dilte nga fusha me rezultat pozitiv”, shtoi italiani.
Maran pranoi zhgënjimin për humbjen, por kërkoi që skuadra të ruajë elementet pozitive të paraqitjes në Helsinki.
“Rezultati dhemb, por dua ta vlerësoj ekipin përtej episodeve. Nëse vazhdojmë të luajmë kështu, nuk kemi arsye të shqetësohemi. Më vjen keq për tifozët që na ndoqën dhe për të gjithë ata që e duan Kombëtaren”, u shpreh ai.
Tekniku kuqezi shfaqi rezerva edhe për arbitrimin, duke lënë të kuptohet se disa vendime nuk ishin vlerësuar siç duhej.
Pse u zëvendësua Arbër Hoxha
Pas përjashtimit të Berishës, Maran u detyrua të largonte Arbër Hoxhën për të aktivizuar portierin Alen Sherri. Trajneri sqaroi se vendimi ishte taktik dhe nuk lidhej me paraqitjen e sulmuesit.
“Këdo që të largoja në atë moment do të ishte e padrejtë, sepse të gjithë po luanin mirë. Na nevojitej Manaj për të mbajtur topin, ndërsa Muçi organizonte lojën. Hoxha nuk e meritonte të dilte, por ishte një zgjedhje e diktuar nga rrjedha e ndeshjes”, përfundoi Maran.




