Rolando Maran është i kënaqur me fitoren 3-0 ndaj San Marinos, por jo plotësisht me paraqitjen e Shqipërisë. Trajneri italian pranoi se kuqezinjtë mund të kishin krijuar më shumë raste, veçanërisht gjatë pjesës së dytë.
Sipas Maranit, ulja e ritmit pas pushimit lidhej edhe me nevojën për të kursyer energjitë. Shqipëria po përballet me një kalendar të ngjeshur prej katër ndeshjesh brenda 11 ditësh.
“Jam i lumtur për rezultatin, por në paraqitje mund të kishim bërë më tepër. E mbajtëm topin, por duhej ta nisnim më mirë pjesën e dytë dhe të krijonim më shumë raste”, deklaroi trajneri.
“Nuk ka kundërshtarë të thjeshtë”
Maran vlerësoi mënyrën se si skuadra e menaxhoi takimin, duke marrë parasysh edhe emocionet e futbollistëve që debutuan me Kombëtaren.
Samuele Sina e nisi ndeshjen si titullar, ndërsa Klevi Qefalija dhe Luis Hasa u aktivizuan gjatë pjesës së dytë.
Trajneri kujtoi se ndeshjet ndaj kundërshtarëve të tillë mund të komplikohen nëse nuk interpretohen me seriozitet. Ai solli si shembull edhe Finlandën, e cila hasi vështirësi në finalizim përpara se ta thellonte rezultatin ndaj San Marinos.
“Ishin edhe emocionet e debutimit. Lojtarët e menaxhuan mjaft mirë ndeshjen. Në futboll nuk ka kundërshtarë të thjeshtë dhe duhet të ruash përqendrimin”, u shpreh Maran.
Asllani dhe Gjimshiti u zëvendësuan për t’u mbrojtur
Tekniku kuqezi shpjegoi se disa nga zëvendësimet u bënë duke menduar për ndeshjet e ardhshme. Kristjan Asllani, i cili ishte ndëshkuar me karton të verdhë, u largua për të shmangur një tjetër ndëshkim që mund ta rrezikonte përballë Finlandës.
Edhe kapiteni Berat Gjimshiti u zëvendësua pas pjesës së parë për të menaxhuar ngarkesën fizike.
“Duhej të tregoheshim të kujdesshëm. Asllani kishte një karton, ndërsa Gjimshiti doli pas pjesës së parë. Ishte çështje menaxhimi të skuadrës”, përfundoi Maran.
Shqipëria kryeson grupin me gjashtë pikë pas dy fitoreve dhe tashmë e zhvendos vëmendjen te transferta vendimtare ndaj Finlandës.




