Feta Fetai rikthehet në dispozicion të Kombëtares shqiptare për ndeshjen e rëndësishme ndaj Finlandës. Mesfushori do të jetë pjesë e listës së takimit dhe një alternativë për trajnerin Rolando Maran.
Fetai ishte grumbulluar për herë të fundit me ekipin e parë më 14 tetor 2024, në transfertën ndaj Gjeorgjisë në Ligën e Kombeve. Në atë takim qëndroi në pankinë dhe nuk u aktivizua nga trajneri i atëhershëm, Silvinjo, ndaj vazhdon të presë debutimin me fanellën kuqezi.
Ish-kapiteni i Shqipërisë U-21 u ftua në këtë grumbullim për të zëvendësuar Qazim Laçin, i cili u largua për shkak të dëmtimit. Megjithatë, Fetai nuk ishte pjesë e listës përfundimtare në dy ndeshjet e para ndaj Bjellorusisë dhe San Marinos, duke i ndjekur ato nga tribuna.
Për sfidën në Helsinki rikthehen në dispozicion edhe Naser Aliji dhe Klisman Cake. Ndërkohë, jashtë listës së 23 lojtarëve dhe në tribunë do të qëndrojnë Samuele Sina, Klevi Qefalija dhe Sabah Kerjota.
Shqipëria e pret përballjen me Finlandën nga vendi i parë në Grupin C1, me dy pikë më shumë se kundërshtari. Takimi nis në orën 15:00 dhe mund të ndikojë ndjeshëm në garën për kreun.




