TË FUNDIT
Kthehu te lajmet
Kombëtare

Maran rrëfehet në Itali: Fjalimi viral, Caprile dhe sekreti i Shqipërisë

Suksesi i Shqipërisë në Ligën e Kombeve ka bërë jehonë edhe në Itali.

Maran rrëfehet në Itali: Fjalimi viral, Caprile dhe sekreti i Shqipërisë

Suksesi i Shqipërisë në Ligën e Kombeve ka bërë jehonë edhe në Itali. Rolando Maran është kthyer në një nga emrat më të komentuar pas ngjitjes së kuqezinjve në Ligën B, ndërsa fjalimi i tij në dhomat e zhveshjes dhe intervista për “La Gazzetta dello Sport” kanë tërhequr vëmendjen e mediave italiane.

Nga një trajner që kërkonte një kapitull të ri në karrierë, në protagonistin e suksesit të Kombëtares shqiptare. Rolando Maran ka fituar vlerësime në vendin e tij pas përfundimit të fazës së grupeve të Nations League, ku Shqipëria siguroi vendin e parë dhe ngjitjen në Ligën B.

Mediat italiane i kanë kushtuar hapësirë punës së teknikut, duke e cilësuar edhe si “heroin e ri të Shqipërisë”. Vëmendje të veçantë ka marrë fitorja 2-0 ndaj Bjellorusisë në Budapest, por edhe mënyra se si Maran festoi me futbollistët pas përmbushjes së objektivit.

Në një intervistë të gjatë për “La Gazzetta dello Sport”, trajneri ka folur për ndryshimin e mentalitetit te kuqezinjtë, marrëdhënien me tifozët, zgjedhjet taktike dhe ambicien për të siguruar pjesëmarrjen në Europianin 2028.

Fjalimi që u bë viral: “Kush e do këtë fanellë, duhet të jetë krenar për ju”

Një nga momentet më të komentuara pas triumfit ndaj Bjellorusisë ishte fjalimi i Maran në dhomat e zhveshjes. Tekniku italian iu drejtua futbollistëve me një mesazh krenarie për atë që kishin arritur.

“Çdokush që e do këtë fanellë, nuk mund të mos jetë krenar për ju”, ishte mesazhi që u shpërnda gjerësisht në rrjetet sociale.

Maran pranoi se nuk e kishte menduar që ky moment do të bëhej publik, por u shpreh i kënaqur që tifozët patën mundësinë të përjetonin emocionet e skuadrës.

“Zakonisht këto gjëra mbeten brenda dhomës së zhveshjes. Nuk e di kush e ka bërë videon, por ishte diçka pozitive, sepse patëm mundësinë të ndanim me tifozët lumturinë tonë”, deklaroi ai.

Trajneri kujtoi se ndeshja me Bjellorusinë u zhvillua në Budapest, në fushë neutrale dhe pa praninë e publikut. Për këtë arsye, videoja u kthye në një mënyrë për të përcjellë festën te mbështetësit kuqezi.

“Kemi rikthyer entuziazmin”, bilanci i Maran pas gjashtë muajsh

Përtej ngjitjes në Ligën B, Maran e konsideron rikthimin e besimit te Kombëtarja si një nga arritjet më të rëndësishme të punës së tij.

“Shqipëria vinte nga një periudhë negative dhe ne u përpoqëm të ndryshonim mentalitetin dhe të arrinim rezultatet e kërkuara përmes një qasjeje që do të përfshinte jo vetëm lojtarët, por edhe tifozët. Dhe kjo funksionoi”, u shpreh italiani.

Ai vlerësoi gjithashtu rezultatet e arritura në Nations League, duke theksuar se skuadra regjistroi shifra pozitive në pikë, gola të shënuar dhe organizim mbrojtës.

Sipas Maran, një pjesë e rëndësishme e këtij progresi lidhet me marrëdhënien e krijuar mes skuadrës dhe publikut shqiptar.

“Në Shqipëri, Kombëtarja është skuadra e parë për të gjithë, njësoj si të ishte një klub. E ndiejmë përgjegjësinë për t’i dhuruar kënaqësi një populli të tërë”, deklaroi trajneri.

Euro 2028, objektivi i madh dhe mundësia për të sfiduar Italinë

Pas suksesit në Ligën e Kombeve, vëmendja e Shqipërisë është zhvendosur te eliminatoret e Kampionatit Europian 2028.

Maran nuk e fsheh ambicien për ta çuar Kombëtaren në fazën finale, duke vlerësuar cilësitë e grupit dhe mundësinë për të përfshirë gradualisht futbollistë të rinj.

I pyetur nëse do të dëshironte një përballje me Italinë në eliminatore, tekniku nuk dha një përgjigje të prerë.

“Sigurisht që do të ishte një emocion i madh dhe do të kishte një shije të veçantë. Pavarësisht kundërshtarëve, shpresojmë të arrijmë të kualifikohemi”, tha ai.

Trajneri vlerësoi edhe punën e Federatës Shqiptare të Futbollit me ekipet kombëtare të moshave, të cilat i sheh si një burim të rëndësishëm për të ardhmen e përfaqësueses.

Caprile në Kombëtare? Maran flet për portierin e Cagliarit

Një nga temat më interesante të intervistës ishte mundësia e afrimit të portierit Elia Caprile te Shqipëria.

Maran konfirmoi se futbollisti i Cagliarit ka marrë pasaportën shqiptare për arsye familjare, por sqaroi se çështja e përfaqësimit ndërkombëtar nuk është diskutuar ende.

“Elia e ka marrë pasaportën shqiptare për arsye familjare, por ende nuk e ka përfunduar procedurën dhe për këtë arsye nuk kemi folur për këtë çështje. Megjithatë, nëse do të ishte i disponueshëm, sigurisht që do të na bënte punë”, deklaroi trajneri.

Italiani zbuloi se stafi teknik po ndjek vazhdimisht futbollistë që aktivizohen jashtë Shqipërisë, përfshirë edhe lojtarë me dy shtetësi.

Sipas tij, më shumë se 90% e futbollistëve të Kombëtares luajnë jashtë vendit, çka kërkon udhëtime të shpeshta dhe monitorim të vazhdueshëm.

Hysaj pa klub, Shpendi në pritje dhe vlerësimi për Manajn e Muçin

Maran foli edhe për disa nga emrat më të rëndësishëm të skuadrës.

Një vëmendje të veçantë ia kushtoi Elseid Hysajt, i cili vazhdon të aktivizohet rregullisht me Kombëtaren, megjithëse prej muajsh nuk ka kontratë me ndonjë klub.

“Hysaj stërvitet me Empolin dhe ne vazhdojmë ta monitorojmë. Kur vjen në Kombëtare, duket sikur është një lojtar që aktivizohet rregullisht me klubin e tij. Nuk e kuptoj pse nuk i jepet besim”, u shpreh Maran.

Për Cristian Shpendin, i cili po spikat në Serie B me Cesenën, trajneri pranoi se konkurrenca në sulm ka kufizuar hapësirat e tij.

“Shpendi është i mirë dhe e tregon këtë gjithmonë në stërvitje. Do të ketë mundësitë e tij”, theksoi italiani.

Vlerësime pati edhe për Rey Manajn, të cilin e cilësoi një futbollist në kulmin e pjekurisë sportive, me një qasje profesionale dhe aftësi të spikatura për të shënuar.

Ndërsa për Ernest Muçin, Maran evidentoi cilësitë teknike dhe goditjen e tij, pas golit spektakolar të realizuar kundër Finlandës.

Pse Maran zgjodhi mbrojtjen me tre lojtarë

Një nga ndryshimet më të dukshme të Shqipërisë nën drejtimin e Maran ka qenë organizimi taktik.

Trajneri shpjegoi se zgjedhja e sistemit me tre mbrojtës lidhej me karakteristikat e futbollistëve që kishte në dispozicion.

Sipas tij, kjo vendosje i jep skuadrës mundësinë të shfrytëzojë më mirë krahët, duke përfshirë lojtarët anësorë në sulm, si dhe të vendosë dy futbollistë në mbështetje të Manajt.

Maran theksoi se drejtimi i një Kombëtareje kërkon qartësi në komunikim, pasi koha për të punuar me lojtarët është më e kufizuar sesa në një klub.

“Si trajner i Kombëtares duhet të jesh i vendosur në zgjedhje dhe i qartë e konciz në shpjegime. Idetë dhe konceptet duhet të përcillen shpejt dhe qartë”, shpjegoi ai.

“Tirana më mbush me krenari, por edhe me përgjegjësi”

Në fund të intervistës, Maran foli edhe për jetën e tij në Shqipëri dhe marrëdhënien me njerëzit.

Trajneri tregoi se jeton pranë selisë së FSHF-së dhe se është përshtatur mirë me kryeqytetin shqiptar.

“Tirana është një qytet mikpritës dhe në zhvillim të vazhdueshëm. Njerëzit më njohin dhe pasioni i popullit shqiptar është diçka që më jep shumë kënaqësi. Më mbush me krenari, por edhe me përgjegjësi”, deklaroi ai.

Ngjitja në Ligën B i ka dhënë Maran një fillim të suksesshëm në krye të Shqipërisë dhe ka rikthyer emrin e tij në vëmendjen e mediave italiane.

Tashmë, sfida e radhës është edhe më e madhe: të kthejë entuziazmin e krijuar në Nations League në rezultate që mund ta dërgojnë Shqipërinë në Kampionatin Europian 2028.