TË FUNDIT
Kthehu te lajmet
Kombëtare

Maran surprizon me zgjedhjet, titullari ndaj San Marinos mbetet në tribunë

Rolando Maran ka përcaktuar lojtarët që do të mbeten jashtë protokollit për ndeshjen e sotme ndaj Finlandës.

Maran surprizon me zgjedhjet, titullari ndaj San Marinos mbetet në tribunë

Rolando Maran ka përcaktuar lojtarët që do të mbeten jashtë protokollit për ndeshjen e sotme ndaj Finlandës. Samuele Sina, Sabah Kerjota dhe Klevi Qefalija nuk do të jenë pjesë e listës me 23 futbollistë.

Në dispozicion të trajnerit rikthehen Klisman Cake, Feta Fetai dhe Naser Aliji. Cake është riaftësuar pas dëmtimit që e mbajti jashtë dy takimeve të para, ndërsa Fetai dhe Aliji do të jenë alternativa në pankinë.

Luis Hasa nuk ndodhet në Helsinki. Mesfushori u kthye në Tiranë për shkak të temperaturës së lartë, por është rikuperuar dhe ka nisur një program individual. Ai pritet të jetë gati për ndeshjen e 6 tetorit ndaj San Marinos.

Sina dhe Qefalija, jashtë pas debutimit

Vendimi për Sinën dhe Qefalijan bie në sy, pasi të dy morën minuta në fitoren 3-0 ndaj San Marinos.

Sina e nisi atë takim si titullar dhe zhvilloi debutimin e tij me Kombëtaren A. Qefalija u aktivizua në pjesën e dytë, duke regjistruar gjithashtu paraqitjen e parë me kuqezinjtë.

Mbrojtësi 19-vjeçar ishte një nga dy risitë e listës së Maranit, së bashku me Sabah Kerjotën. Ky i fundit nuk ka marrë ende minuta dhe do të mbetet sërish jashtë protokollit.

Zgjedhjet nuk janë konfirmuar ende përmes listës zyrtare të ndeshjes, por raportohen si vendime teknike të trajnerit.

Finlandë-Shqipëri nis në orën 15:00 në stadiumin Olimpik të Helsinkit. Kuqezinjtë kryesojnë Grupin C1 me gjashtë pikë, dy më shumë se vendasit. Një fitore do ta çonte skuadrën e Maranit pesë pikë larg rivalit kryesor.