Rikthimi i Etrit Berishës ishte një nga surprizat më të mëdha në listën e Rolando Maranit për ndeshjet e Ligës së Kombeve. Portieri nuk luante me Shqipërinë që prej vitit 2024 dhe, pas përfundimit të Europianit, nuk ishte më pjesë e zgjedhjeve të trajnerit të atëhershëm Sylvinho.
Për shumëkënd, aventura e tij me fanellën kuqezi dukej e përfunduar. Të njëjtën përshtypje kishte krijuar edhe vetë Berisha, i cili numëron 81 paraqitje me Kombëtaren që nga debutimi i tij në vitin 2012.
“Mendoja se ishte një kapitull i mbyllur”, deklaroi portieri për mediat suedeze, të cilat i kanë kushtuar vëmendje rikthimit të tij në përfaqësuese.
Berisha luan në kampionatin suedez me Häcken që prej vitit 2025. Paraqitjet e tij me klubin kanë bindur Maranin ta rikthejë në Kombëtare pas një mungese të gjatë.
Portieri 37-vjeçar pritet të ketë një rol të rëndësishëm gjatë ndeshjeve të këtij grumbullimi. Këtë e la të kuptohej edhe trajneri italian gjatë konferencës për shtyp në të cilën prezantoi listën e lojtarëve. Përvoja e Berishës dhe njohja e ambientit kuqezi mund të jenë të vlefshme për Shqipërinë në fillimin e këtij cikli të ri.




