Lojtarët e Vllaznisë janë rikthyer sot në stërvitje nën drejtimin e trajnerit Csaba Laszlo. Seanca nisi në orën 11:00 në stadiumin “Reshit Rusi”, duke rikthyer përkohësisht normalitetin në kampin kuqeblu pas tensioneve të ditëve të fundit.
Futbollistët kishin bojkotuar stërvitjen për shkak të pagave të prapambetura, ndërsa klubi reagoi duke i gjobitur me 15 për qind të pagës.
Sot është shlyer një pjesë e detyrimeve financiare ndaj lojtarëve, ndërsa drejtuesit kanë premtuar se pjesa e mbetur do të likuidohet në vazhdim. Ky zhvillim ka bindur skuadrën të ndërpresë bojkotin dhe të rikthehet në fushën stërvitore.
Situata ka krijuar jo pak shqetësim, sidomos pasi kanë kaluar vetëm pesë javë nga fillimi i sezonit. Përpara është ndeshja ndaj Dinamos dhe trajneri Laszlo kërkon që skuadra të përqendrohet plotësisht te përgatitjet.
Kriza duket se ka sjellë ndryshime edhe në drejtimin sportiv. Vioresin Sinani nuk ndodhet më pranë skuadrës dhe raportohet se ka dhënë dorëheqjen nga posti i drejtorit sportiv, megjithëse klubi ende nuk ka publikuar një njoftim zyrtar.
Në këtë detyrë ka nisur punën Alban Hasani, i cili pritet të menaxhojë një situatë delikate si në aspektin sportiv, ashtu edhe në marrëdhëniet mes drejtuesve dhe futbollistëve.
Rikthimi në stërvitje ul për momentin tensionet, por çështja nuk mund të konsiderohet plotësisht e mbyllur. Normaliteti te Vllaznia do të rikthehet vetëm pasi të shlyhen të gjitha detyrimet dhe skuadra të përqendrohet pa shpërqendrime te vazhdimi i kampionatit.




