Sabah Kerjota ishte një nga risitë e listës së Rolando Maranit për katër ndeshjet e para të Ligës së Kombeve. Trajneri italian e ndoqi nga afër në Skoci përpara se ta ftonte në ekipin e parë, por sulmuesi nuk u përfshi në listën përfundimtare të asnjë takimi.
Kerjota i ndoqi nga tribuna të katërta sfidat ndaj Bjellorusisë, San Marinos dhe Finlandës. Asnjë lojtar tjetër i grumbulluar nga Maran nuk pati të njëjtin fat gjatë kësaj dritareje ndërkombëtare.
Asnjë mundësi edhe ndaj San Marinos
Fakti që katër ndeshjet u zhvilluan brenda 11 ditësh krijoi pritshmëri për rotacion dhe përdorimin e një numri më të madh futbollistësh. Kjo nuk i solli minuta Kerjotës, i cili nuk arriti të siguronte as një vend në pankinë.
Mungesa e tij bie në sy edhe për shkak të rolit. Futbollisti 25-vjeçar i Hearts aktivizohet natyrshëm në krahun e djathtë të sulmit, një pozicion ku Shqipëria ka përdorur lojtarë të përshtatur gjatë ndeshjeve të fundit.
As përballja e sotme me San Marinon, përfaqësuesen e fundit në renditjen e FIFA-s, nuk i ka dhënë mundësinë për të treguar vlerat e tij.
Krahu i djathtë mbetet pa specialist
Jasir Asani dhe Arbnor Muja janë dy alternativat e tjera natyrale për këtë pozicion, por asnjëri nuk është pjesë e grumbullimit aktual.
Asani e ka shprehur publikisht zhgënjimin për mungesën e ftesës. Muja, ndërkohë, ka kohë që nuk përfshihet rregullisht në planet e Kombëtares dhe në paraqitjen e tij të fundit mori vetëm pak minuta.
Në mungesë të tyre, Kerjota u grumbullua si alternativa e vetme natyrale në të djathtë të sulmit. Megjithatë, Maran nuk e përfshiu në asnjërën prej katër listave të ndeshjeve, duke e mbyllur këtë grumbullim pa i dhënë mundësinë e debutimit.




