Ernest Muçi dhe Etrit Berisha kanë komentuar fitoren 2-0 të Shqipërisë ndaj Finlandës në “Air Albania”, duke vlerësuar paraqitjen e kuqezinjve dhe rëndësinë e tri pikëve në Ligën e Kombeve.
Autori i golit të parë foli për momentin pozitiv që po përjeton me fanellën kuqezi dhe vështirësitë që ka kaluar gjatë karrierës. Ndërkohë, Berisha theksoi forcën e grupit dhe objektivin për t'u ngjitur në Ligën B.
Muçi: Kam kaluar shumë për të arritur këtu
Ernest Muçi ishte një nga protagonistët kryesorë të fitores ndaj Finlandës, duke zhbllokuar rezultatin në minutën e 35-të me një goditje spektakolare me pjesën e jashtme të këmbës.
Pas ndeshjes, sulmuesi vlerësoi paraqitjen e skuadrës dhe organizimin në mesfushë, duke e cilësuar takimin si një nga më të mirët e kuqezinjve.
“Sot kishim katër mesfushorë në mesfushë. Kemi bërë një nga ndeshjet më të mira”, deklaroi Muçi.
I pyetur nëse po kalon momentin më të mirë me Kombëtaren, futbollisti pranoi se besimi që po merr nga trajneri, shokët e skuadrës dhe tifozët ka një rëndësi të veçantë për të.
“Po, ky është momenti kur ndiej besimin e shokëve të ekipit, trajnerit dhe tifozëve. Kam kaluar shumë për të arritur këtu”, u shpreh ai.
Berisha: Jemi ekip solid, rivalët e kanë të vështirë të na shënojnë
Etrit Berisha, i rikthyer në portën e Shqipërisë pas kartonit të kuq të marrë në përballjen e parë ndaj Finlandës, u shpreh i kënaqur me reagimin e skuadrës.
“E dimë që kemi një ekip shumë të mirë dhe sonte bëmë një paraqitje shumë të mirë. Edhe në sfidën e parë ndaj Finlandës e nisëm shumë mirë, por më pas ndodhi ajo që ndodhi”, deklaroi portieri.
Berisha theksoi se Shqipëria ka treguar siguri në fazën mbrojtëse dhe se skuadra nuk duhet të mbështetet vazhdimisht te pritjet vendimtare të portierit.
“Është e rëndësishme që në këto ndeshje të mos jemi gjithmonë të varur nga ndërhyrjet vendimtare të portierit për të mbajtur ekipin në lojë. Ne e dimë që jemi një ekip solid. Rivalët e kanë të vështirë të na shënojnë”, shtoi ai.
Objektivi i Berishës: Ngjitja në Ligën B
Portieri kuqezi u ndal edhe te objektivat e Shqipërisë në Ligën e Kombeve, duke shprehur dëshirën që skuadra të vazhdojë me paraqitje pozitive dhe të ruajë portën e paprekur.
“Në ndeshjen ndaj Suedisë, kisha një kohë të gjatë pa pësuar gol. Shpresoj që edhe në ndeshjen e ardhshme të mos pësojmë. Duam të rritemi dhe të kualifikohemi në Ligën B”, deklaroi Berisha.
Fitorja ndaj Finlandës e ka ngjitur Shqipërinë në kuotën e 12 pikëve në Grupin C1, duke e afruar me objektivin e vendit të parë.
Kuqezinjtë do të zhvillojnë ndeshjen e fundit të grupit më 15 nëntor, në transfertë ndaj Bjellorusisë, ku do të kërkojnë të sigurojnë ngjitjen në Ligën B.




