Nëntori do të jetë një muaj i ngarkuar për futbollin shqiptar. Nga Kombëtarja A te përfaqësueset e moshave, vajzat, futsalli dhe futbolli amator, ekipet kuqezi do të zhvillojnë një sërë ndeshjesh ndërkombëtare në kompeticione zyrtare dhe turne përgatitorë.
Vëmendja kryesore do të jetë te dy përballjet e fundit të Shqipërisë në Nations League, ku skuadra kuqezi synon të ruajë vendin e parë në grup. Ndërkohë, Kombëtarja U-21 do të testojë forcat ndaj Luksemburgut dhe Spanjës, në kuadër të përgatitjeve për Europianin 2027.
Në total, gjatë nëntorit janë programuar 20 ndeshje për përfaqësueset shqiptare, ndërsa kalendari i vajzave U-19 do të vijojë edhe në fillim të dhjetorit.
Kombëtarja A, dy finale për kreun në Nations League
Shqipëria do ta mbyllë fazën e grupeve të Nations League me dy takime vendimtare.
Më 12 nëntor, kuqezinjtë do të presin Finlandën në stadiumin “Air Albania”, duke nisur nga ora 20:45. Tri ditë më vonë, më 15 nëntor, Shqipëria do të përballet me Bjellorusinë në transfertë, në stadiumin “Illovszky Rudolf”, në orën 18:00.
Dy ndeshjet do të përcaktojnë pozitat përfundimtare në grupin C1, ku objektivi i Shqipërisë është ruajtja e vendit të parë.
U-21 përballet me Luksemburgun dhe Spanjën
Kombëtarja U-21 do të zhvillojë dy miqësore në Tiranë, si pjesë e përgatitjeve për Kampionatin Europian të vitit 2027.
Skuadra e Alban Bushit do të luajë fillimisht ndaj Luksemburgut më 13 nëntor, ndërsa më 17 nëntor do të përballet me Spanjën.
Të dyja takimet do të zhvillohen në stadiumin “Air Albania”, në orën 19:00.
Për Shqipërinë, e cila është një nga vendet organizatore të Europianit U-21 2027, këto ndeshje përbëjnë një mundësi për të vlerësuar futbollistët dhe për të përgatitur grupin për turneun final.
U-19 dhe U-17, në garë për Europianin 2027
Përfaqësuesja U-19 do të luajë dy takime në raundin e dytë të kualifikueseve të Europianit 2027.
Më 11 nëntor, Shqipëria do të përballet me Qipron, ndërsa më 14 nëntor do të sfidojë Armeninë. Të dyja ndeshjet janë programuar në stadiumin “Sotira Municipal”, në orën 13:30.
Ndërkohë, Kombëtarja U-17 do të marrë pjesë në një mini-turne kualifikues që do të zhvillohet në Shqipëri.
Kuqezinjtë do të luajnë ndaj Suedisë më 11 nëntor, Skocisë më 14 nëntor dhe Finlandës më 17 nëntor. Të tria përballjet do të zhvillohen në “Elbasan Arena”, duke nisur nga ora 14:00.
Vajzat U-19 nisin kualifikueset, U-15 në turne zhvillimor
Edhe Kombëtarja U-19 e vajzave do të nisë rrugëtimin në kualifikueset e Europianit 2027.
Ndeshja e parë është programuar më 27 nëntor kundër Qipros, ndërsa më 30 nëntor Shqipëria do të përballet me Moldavinë.
Turneu do të përfundojë më 3 dhjetor, me sfidën ndaj Letonisë. Të tria ndeshjet do të zhvillohen në kompleksin “Shtëpia e Futbollit”, në orën 14:00.
Në të njëjtin kompleks do të luajë edhe Kombëtarja U-15, e cila do të marrë pjesë në turneun UEFA Development.
Shqipëria do të përballet me Irlandën e Veriut më 19 nëntor, Poloninë më 21 nëntor dhe Ishujt Faroe më 24 nëntor.
Angazhime edhe për futbollin amator dhe futsallin
Përfaqësuesja e futbollit amator do të zhvillojë dy takimet e fundit në UEFA Regions’ Cup.
Më 1 nëntor, Shqipëria do të përballet me Piemonte Valle d’Aosta, ndërsa më 4 nëntor do të luajë kundër NI Eastern. Të dyja ndeshjet do të zhvillohen në “Egnatia Arena”.
Ndërkohë, Kombëtarja e futsallit do të nisë angazhimet në fazën “Main Round” të kualifikueseve për Kupën e Botës FIFA Futsal 2028.
Kuqezinjtë do të përballen me Bjellorusinë më 6 nëntor, në orën 15:30, në sallën sportive “Humenne”, në Sllovaki.
Kalendari i plotë i Kombëtareve shqiptare në nëntor
Data | Ndeshja | Ora |
|---|---|---|
1 nëntor | Piemonte Valle d’Aosta – Shqipëri (amatorë) | 14:00 |
4 nëntor | Shqipëri – NI Eastern (amatorë) | 13:30 |
6 nëntor | Bjellorusi – Shqipëri (futsall) | 15:30 |
11 nëntor | Shqipëri U-19 – Qipro U-19 | 13:30 |
11 nëntor | Suedi U-17 – Shqipëri U-17 | 14:00 |
12 nëntor | Shqipëri – Finlandë | 20:45 |
13 nëntor | Shqipëri U-21 – Luksemburg U-21 | 19:00 |
14 nëntor | Armeni U-19 – Shqipëri U-19 | 13:30 |
14 nëntor | Skoci U-17 – Shqipëri U-17 | 14:00 |
15 nëntor | Bjellorusi – Shqipëri | 18:00 |
17 nëntor | Shqipëri U-17 – Finlandë U-17 | 14:00 |
17 nëntor | Shqipëri U-21 – Spanjë U-21 | 19:00 |
19 nëntor | Shqipëri U-15 – Irlandë e Veriut U-15 | 14:00 |
21 nëntor | Shqipëri U-15 – Poloni U-15 | 14:00 |
24 nëntor | Shqipëri U-15 – Ishujt Faroe U-15 | 14:00 |
27 nëntor | Qipro U-19 – Shqipëri U-19 (vajza) | 14:00 |
30 nëntor | Shqipëri U-19 – Moldavi U-19 (vajza) | 14:00 |
3 dhjetor | Shqipëri U-19 – Letoni U-19 (vajza) | 14:00 |
Kalendari përmban 17 ndeshje në nëntor dhe një takim të programuar për 3 dhjetor.




