Shqipëria mori tri pikët ndaj San Marinos, por një ndeshje që duhej të ishte formalitet u kthye në një provë nervash. Kuqezinjtë fituan 2-1 vetëm falë një penalltie në minutat shtesë, pasi rrezikuan të regjistronin një nga rezultatet më të sikletshme në historinë e Kombëtares.
Ka fitore që sjellin qetësi dhe të tjera që lënë pas shumë pikëpyetje. Kjo ndaj San Marinos i përket kategorisë së dytë. Rezultati ishte ai që pritej, por mënyra se si u arrit duhet të shqetësojë trajnerin Rolando Maran.
Kundërshtari ishte përfaqësuesja e fundit në renditjen e FIFA-s, e cila nuk i kishte shënuar asnjëherë Shqipërisë. Megjithatë, për disa minuta, San Marino ishte pranë një barazimi historik në “Air Albania”.
Avantazhi që e vuri Shqipërinë në gjumë
Goli i shpejtë i Kristjan Asllanit krijoi përshtypjen se kuqezinjtë do ta mbyllnin pa vështirësi ndeshjen. Shqipëria kontrolloi topin dhe krijoi raste, por nuk tregoi qartësinë e nevojshme përpara portës.
Mundësitë e shpërdoruara, zgjedhjet individuale dhe ulja e ritmit e mbajtën San Marinon në lojë. Në vend që të kërkonte golin e dytë dhe ta mbyllte takimin, skuadra e Maranit veproi sikur fitorja të ishte siguruar që në pjesën e parë.
Kjo qasje i dha kundërshtarit besimin se mund të merrte diçka nga ndeshja. Kur nuk e ndëshkon një skuadër dukshëm më të dobët, rrezikon t’i japësh mundësinë të të vendosë në vështirësi.
Lazzari hesht “Air Albanian”
Në minutën e 66-të ndodhi ajo që pak kush e kishte parashikuar. Lazzari shënoi golin e barazimit, të parin në historinë e San Marinos kundër Shqipërisë, dhe heshti stadiumin.
Nga një ndeshje që pritej të shërbente edhe për përmirësimin e golavarazhit, kuqezinjtë u gjendën duke luftuar për të shmangur humbjen e dy pikëve. Presioni u rrit, koha kalonte dhe skuadra shqiptare nuk po gjente dot rrugën drejt portës.
Në ato minuta, problemi nuk ishte vetëm rezultati. Shqipëria po rrezikonte të shkruante një nga faqet më të sikletshme të historisë së saj përballë një kundërshtari gjysmëamator.
Asllani shmang turpërimin në shtesë
Fitorja erdhi vetëm në minutat shtesë. Shqipëria fitoi një penallti dhe Asllani u tregua i saktë nga pika e bardhë, duke shënuar golin e tij të dytë personal dhe atë të rezultatit 2-1.
Mesfushori që kishte hapur ndeshjen përfundoi duke e shpëtuar Kombëtaren nga një barazim që do të kishte pasoja të mëdha sportive dhe emocionale.
Në klasifikim mbeten tri pikët, por paraqitja nuk mund të kalojë pa analizë. Shqipëria fitoi, ndërsa San Marino mori golin e parë historik ndaj kuqezinjve dhe ishte vetëm pak minuta larg një rezultati të jashtëzakonshëm.
Këtë herë dështimi u shmang në fund. Fitorja mban gjallë objektivin për vendin e parë, por nuk mund ta fshehë mënyrën alarmante se si një ndeshje e kontrolluar u kthye në makth.




