TË FUNDIT
Kthehu te lajmet
Kombëtare

Nga Kosova te Shqipëria, mbrojtësi 24-vjeçar merr pasaportën kuqezi

Kombëtarja shqiptare mund të shtojë një tjetër alternativë në repartin e mbrojtjes.

Nga Kosova te Shqipëria, mbrojtësi 24-vjeçar merr pasaportën kuqezi

Kombëtarja shqiptare mund të shtojë një tjetër alternativë në repartin e mbrojtjes. Amar Gërxhaliu, futbollisti që aktivizohet me Erzurumspor në Turqi, është pajisur me pasaportën shqiptare, duke hedhur një hap të rëndësishëm drejt një rikthimi të mundshëm te kuqezinjtë.

Qendërmbrojtësi 24-vjeçar ka një histori të veçantë me dy përfaqësueset shqiptare. Fillimisht ishte pjesë e ekipeve kombëtare të moshave të Shqipërisë, përpara se të vendoste të përfaqësonte Kosovën, ku arriti deri te skuadra U21.

Në vitin 2023, Gërxhaliu mori edhe një ftesë nga Kombëtarja A e Kosovës, por nuk pati mundësinë të debutonte në një ndeshje zyrtare apo miqësore.

Tashmë, pajisja me dokumentacionin shqiptar mund t'i hapë rrugën një ndryshimi tjetër të përfaqësueses, këtë herë për t'u vënë nën urdhrat e trajnerit Rolando Maran.

Megjithatë, përpara një aktivizimi të mundshëm me Shqipërinë, duhet të plotësohen edhe procedurat përkatëse të FIFA-s për të drejtën e përfaqësimit.

Gërxhaliu vjen pas dy sezoneve ku ka qenë titullar i rregullt me Erzurumspor në futbollin turk. Aktivizimi i vazhdueshëm dhe përvoja e fituar mund ta kthejnë në një alternativë të vlefshme për qendrën e mbrojtjes kuqezi.

Mbetet për t'u parë nëse 24-vjeçari do të përfshihet në planet e Maran për grumbullimet e ardhshme, ndërsa marrja e pasaportës shqiptare ka shtuar mundësitë për një afrim të tij me Kombëtaren.