TË FUNDIT
Kthehu te lajmet
Kategoria Superiore

Nga triumfi te debutuesit, Tirana paraqitet me një fytyrë të re në derbi

Tirana e fitoi 2-1 derbin e fundit ndaj Partizanit, por skuadra që do të zbresë në fushë këtë herë do të jetë shumë ndryshe nga ajo e 25 prillit 2026.

Nga triumfi te debutuesit, Tirana paraqitet me një fytyrë të re në derbi

Tirana e fitoi 2-1 derbin e fundit ndaj Partizanit, por skuadra që do të zbresë në fushë këtë herë do të jetë shumë ndryshe nga ajo e 25 prillit 2026. Brenda pak muajsh, bardheblutë kanë ndryshuar trajnerin, kanë larguar gjysmën e futbollistëve të aktivizuar në atë takim dhe kanë afruar 15 lojtarë që mund ta provojnë për herë të parë derbin e kryeqytetit.

Gjysma e skuadrës fituese është larguar

Në përballjen e fundit, Tirana përmbysi Partizanin dhe fitoi 2-1 falë golave të Kresiçit dhe Alvarezit. Bardheblutë përdorën 14 futbollistë gjatë takimit, por shtatë prej tyre nuk janë më pjesë e klubit.

Bekaj, Vera, Ndong, Mysloviç, Tare, Alvarez dhe Xhixha kanë vazhduar aventurën me Tiranën. Halili, Kortez, Kresiç, Rafael, Kobiljar, Haxhiu dhe Tabeku u larguan gjatë merkatos së verës.

Ndryshimi nuk ka prekur vetëm organikën. Orges Shehi, trajneri që drejtoi skuadrën në suksesin e fundit ndaj Partizanit, nuk rinovoi kontratën dhe u largua nga pankina bardheblu.

Në këtë mënyrë, Tirana do të paraqitet në derbin e radhës me një tjetër drejtim teknik dhe me një skuadër të rindërtuar në të gjitha repartet.

Plot 15 debutues të mundshëm

Merkatoja e verës solli shumë fytyra të reja te 26 herë kampionët e Shqipërisë. Plot 15 futbollistë mund të regjistrojnë paraqitjen e tyre të parë në derbin Tirana-Partizani.

Rejan Cali është debutuesi i mundshëm në portë. Në mbrojtje gjenden Leonat Vitija, Patrik Staniç, Zhosef Kollej, Hugo Fresneda, Bojan Ilievski dhe Olti Qerimaj.

Ardit Krymi dhe Mateo Maçi janë dy emrat e rinj në mesfushë, ndërsa lista më e gjatë vjen nga reparti ofensiv. Bernard Berisha, Drilon Hazrollaj, Aimar Bami, Tomislav Kish, Erdon Daci dhe Serxho Prendi mund të provojnë për herë të parë atmosferën e përballjes më të madhe të kryeqytetit.

Jo të gjithë pritet të aktivizohen, por numri i lartë i debutuesve tregon qartë përmasën e rindërtimit të Tiranës. Përtej tri pikëve, derbi do të jetë një test i rëndësishëm për futbollistët që ende nuk e kanë provuar presionin dhe ngarkesën emocionale të kësaj sfide.

Debutuesit e mundshëm në derbi

Portier

Rejan Cali

Mbrojtës

Leonat Vitija

Patrik Staniç

Zhosef Kollej

Hugo Fresneda

Bojan Ilievski

Olti Qerimaj

Mesfushorë

Ardit Krymi

Mateo Maçi

Sulmues

Bernard Berisha

Drilon Hazrollaj

Aimar Bami

Tomislav Kish

Erdon Daci

Serxho Prendi