Elseid Hysaj vazhdon të jetë pa skuadër dhe prej muajsh nuk ka luajtur në nivel klubesh, por forma e tij me Kombëtaren ka tërhequr vëmendjen.
Mbrojtësi 32-vjeçar u aktivizua në tri nga katër ndeshjet e fundit të Shqipërisë në Ligën e Kombeve dhe ishte ndër lojtarët më të vlerësuar të kuqezinjve. Përveç detyrave mbrojtëse, shkodrani ndihmoi edhe në ndërtimin e aksioneve dhe në daljet nga krahu i djathtë.
Kundër San Marinos, Hysaj mori vlerësimin e dytë më të lartë te Shqipëria, pas autorit të dy golave, Kristjan Asllani. “Flashscore” e vlerësoi me notën 8.4, ndërsa “FotMob” i dha 8.3.
Edhe paraqitja ndaj Bjellorusisë ishte pozitive, ndërsa në transfertën me Finlandën luajti për 90 minuta pavarësisht inferioritetit numerik të kuqezinjve. Vlerësimet në tri ndeshjet tregojnë një rendiment të qëndrueshëm, veçanërisht për një futbollist që nuk ka ritëm nga aktivizimi me klubin.
Paraqitjet e fundit e bëjnë edhe më të vështirë për t’u kuptuar faktin që Hysaj ende nuk ka gjetur skuadrën e radhës. Për Rolando Maranin, ai mbetet një alternativë e rëndësishme në të djathtë të mbrojtjes, ndërsa për vetë lojtarin ndeshjet me Shqipërinë po shërbejnë si mundësia më e mirë për të treguar se është ende në gjendje të luajë në nivele të larta.




