TË FUNDIT
Kthehu te lajmet
Serie A

Pa skuadër prej muajsh, Elseid Hysaj rikthehet te klubi ku nisi karrierën

Elseid Hysaj është rikthyer te Empolit

Pa skuadër prej muajsh, Elseid Hysaj rikthehet te klubi ku nisi karrierën

Elseid Hysaj është rikthyer në ambientet e Empolit, por këtë herë jo për të firmosur një kontratë. Mbrojtësi i Kombëtares shqiptare ka nisur stërvitjen me ekipin e të rinjve të klubit italian, me synimin për të ruajtur formën fizike ndërsa pret një ofertë për të vazhduar karrierën.

33-vjeçari po përgatitet në qendrën sportive të Monteboros, ku zhvillon seanca stërvitore me skuadrën Primavera të Empolit.

Klubi italian i ka hapur dyert ish-futbollistit të tij, i cili ka qenë pjesë e Empolit përpara se të transferohej te Napoli. Megjithatë, prania e Hysajt në stërvitje nuk lidhet me një marrëveshje për t'u rikthyer në skuadrën e parë.

Mbrojtësi shkodran është lojtar i lirë që prej verës dhe mund të firmosë me një klub të ri pa qenë nevoja për një marrëveshje transferimi.

Më parë, edhe Vllaznia i kishte ofruar mundësinë të stërvitej me ekipin për të ruajtur gjendjen fizike.

Situata e Hysajt është e pazakontë, pasi ai vazhdon të jetë një nga futbollistët me më shumë përvojë në Kombëtaren shqiptare, megjithëse prej disa muajsh nuk është pjesë e asnjë klubi.

Deri tani, për mbrojtësin janë përfolur mundësi në Itali, Spanjë dhe Rusi, por asnjë prej tyre nuk është konkretizuar me një kontratë.

Për momentin, Hysaj do të vijojë përgatitjet te Empoli, në pritje të një oferte që do t'i mundësonte rikthimin në futbollin aktiv.