Kombëtarja shqiptare e vajzave është eliminuar nga faza play-off e Kupës së Botës pas humbjes 3-0 në transfertë ndaj Uellsit.
Skuadra e drejtuar nga Armir Grima u përpoq të ushtronte presion ndaj vendëseve, por nuk arriti të gjente rrugën e rrjetës. Uellsi kaloi në avantazh në minutën e 34-t me Davies, duke e mbyllur pjesën e parë në epërsi minimale.
Në fillimin e pjesës së dytë, Hughes dyfishoi rezultatin në minutën e 50-të. Cain shënoi golin e tretë në të 62-ën, duke mbyllur përfundimisht llogaritë e kualifikimit.
Uellsi kishte fituar 1-0 edhe ndeshjen e parë në stadiumin “Loro Boriçi”, duke kaluar në raundin tjetër me rezultatin e përgjithshëm 4-0.
Pavarësisht eliminimit, Shqipëria largohet me kokën lart. Kualifikimi për herë të parë në fazën play-off të Kupës së Botës përbën një arritje historike për futbollin shqiptar të vajzave.
Uells–Shqipëri 3-0
Golat: Davies 34’, Hughes 50’, Cain 62’
Rezultati i përgjithshëm: Uellsi fiton 4-0.




