TË FUNDIT
Kthehu te lajmet
Kategoria Superiore

Përleshje, koreografi dhe dedikimi i Xhixhës, gjithçka që nuk u pa nga derbi i kryeqytetit

Derbi mes Partizanit dhe Tiranës prodhoi emocione në fushë, por edhe tensione jashtë stadiumit “Air Albania”.

Përleshje, koreografi dhe dedikimi i Xhixhës, gjithçka që nuk u pa nga derbi i kryeqytetit

Derbi mes Partizanit dhe Tiranës prodhoi emocione në fushë, por edhe tensione jashtë stadiumit “Air Albania”. Përpara ndeshjes së zhvilluar më 11 tetor, tifozë të të dyja skuadrave u përfshinë në një konflikt pranë impiantit.

Policia ndërhyri për të qetësuar situatën dhe për të shmangur përshkallëzimin e përplasjes. Disa persona u shoqëruan, ndërsa zona rreth stadiumit vijoi të monitorohej nga forcat e rendit.

Rreth 400 efektivë ishin angazhuar për mbarëvajtjen e derbit. Kontrollet në hyrje ishin të rrepta, ndërsa tifozëve iu ndalua futja e mjeteve të forta, përfshirë monedhat dhe karikuesit e telefonave.

Tribuna bosh dhe koreografi të veçanta

Interesi në tribuna ishte më i ulët nga sa pritej. Në katin e dytë nuk ishte shitur asnjë biletë, ndërsa as sektori i poshtëm nuk u mbush plotësisht.

Pavarësisht pranisë së kufizuar, të dyja tifogrupet realizuan koreografitë e tyre. “Tirona Fanatics” shpalosi banderolën me mesazhin: “Der kur fryma t’më mbarojë”.

“Ultras Guerrils” zgjodhi një koreografi që mbuloi tribunën pas portës, ku shkruhej “Ushtria Çlirimtare”. Tifozët e kuq krijuan edhe një spektakël me mjete piroteknike gjatë pjesës së parë.

Mbështetësit bardheblu u përgjigjën me një mesazh ironik ndaj rivalëve: “Me dit kush ia mori fytyrën, Pennywise do ndërronte ngjyrën”.

Mesazhi kundër kancerit të gjirit

Përpara fillimit, futbollistët e të dyja skuadrave dolën në fushë me fanella të zeza dhe një mesazh sensibilizues për kontrollet kundër kancerit të gjirit.

Në aspektin sportiv, Tirana kaloi në avantazh me Redon Xhixhën. Sulmuesi e festoi golin në mënyrë të veçantë, duke ia kushtuar fëmijës që po pret.

Për Partizanin shënoi Himallari, i cili realizoi golin e parë në një derbi. Futbollisti i ri ishte aktivizuar titullar për shkak të rregullit që kërkon praninë e një lojtari të ri. Pak ditë më parë, ai kishte shënuar dy herë ndaj Lituanisë U-19 me Shqipërinë U-19.

Shumë debutues dhe dëmtimi i Skukës

Plot shtatë futbollistë të Tiranës e nisën për herë të parë si titullarë një derbi ndaj Partizanit. Ishte gjithashtu përballja e parë e këtij rivaliteti për trajnerët Florin Bratu dhe Dean Klafuriç.

Një moment shqetësues u regjistrua në pjesën e dytë, kur Xhuljano Skuka pësoi një dëmtim. Në fushë u kërkua barela, por sulmuesi vendosi të largohej vetë. Tirana fitoi takimin 3-1, duke marrë tri pikët dhe krenarinë e kryeqytetit.