TË FUNDIT
Kthehu te lajmet
Kategoria Superiore

Pesë ndeshje pezullim te Dinamo, Disiplina ndëshkon edhe Vllazninë

Komisioni i Disiplinës dhe Etikës pranë Federatës Shqiptare të Futbollit ka publikuar vendimet e radhës.

Pesë ndeshje pezullim te Dinamo, Disiplina ndëshkon edhe Vllazninë

Komisioni i Disiplinës dhe Etikës pranë Federatës Shqiptare të Futbollit ka publikuar vendimet e radhës, duke vendosur gjoba, pezullime dhe humbje ndeshjesh në tavolinë për klube, futbollistë dhe zyrtarë të kategorive të ndryshme.

Mes skuadrave të prekura janë edhe Vllaznia dhe Dinamo City. Klubi shkodran është gjobitur për sjelljen e tifozëve, ndërsa një zyrtar i Dinamos është dënuar me pesë ndeshje pezullim.

Masat më të rënda përfshijnë edhe incidente në futbollin e moshave, ku një takim është ndërprerë përfundimisht për shkak të dhunës ndaj lojtarëve kundërshtarë.

Vllaznia gjobitet, pesë ndeshje pezullim për zyrtarin e Dinamos

Vllaznia është dënuar me gjobë prej 50 mijë lekësh, pasi spektatorët kanë hedhur sende në fushën e lojës. Masa është marrë në bazë të nenit 17/2/b të Kodit të Disiplinës dhe Etikës.

Ndërkohë, zyrtari i Dinamo City, Andri Cara, është pezulluar për pesë ndeshje për sjellje josportive ndaj zyrtarëve të takimit.

Edhe Sopoti është gjobitur me 50 mijë lekë për hedhje sendesh në fushë nga tifozët. Megjithatë, në bazë të dispozitave të kodit disiplinor, gjoba do të aplikohet në masën 50%, që përkthehet në 25 mijë lekë.

Gjashtë ndeshje pezullim për zyrtarët e Eagle Football dhe Laçit U-17

Komisioni ka marrë masa edhe ndaj disa zyrtarëve të klubeve të tjera.

Edison Kaja, zyrtar i Eagle Football, është pezulluar për tri ndeshje, pasi ka hyrë në mënyrë të paautorizuar dhe të parregullt në fushën e lojës.

Po nga Eagle Football, Andi Matraxhiu është dënuar me gjobë prej 20 mijë lekësh dhe gjashtë ndeshje pezullim nga çdo veprimtari e organizuar nga FSHF-ja, për sjellje të përsëritur josportive ndaj zyrtarëve të ndeshjes.

I njëjti dënim, gjobë prej 20 mijë lekësh dhe gjashtë ndeshje pezullim, është vendosur edhe për Naim Halilajn e Laçit U-17.

Për detyrimet monetare të zyrtarëve përkatës, Eagle Football dhe Laçi mbajnë përgjegjësi solidare.

Ndërkohë, Mario Bytyçi i Tërbunit dhe Klodian Arbri i Tomorit janë pezulluar secili për katër ndeshje, për sjellje josportive ndaj zyrtarëve të takimeve.

Dënime për Partizanin dhe Apoloninë U-17

Masat disiplinore kanë prekur edhe futbollistët e ekipeve U-17 të Partizanit dhe Apolonisë.

Nga Apolonia, Eldi Bitri është pezulluar për dy ndeshje për sjellje josportive ndaj kundërshtarëve, ndërsa Marelio Hina është dënuar me katër ndeshje për sjellje të dhunshme.

Te Partizani U-17, Noel Hasa ka marrë dy ndeshje pezullim, ndërsa Briseld Mesiti është dënuar me katër ndeshje për sjellje të dhunshme ndaj lojtarëve kundërshtarë.

Gjithashtu, zyrtari i Partizanit U-17, Bektash Çapoku, është pezulluar për katër ndeshje për sjellje josportive ndaj zyrtarëve të takimit.

Dhuna ndërpret ndeshjen, Football Republic U-17 dënohet me humbje 3-0

Një nga vendimet më të rënda lidhet me Football Republic U-17.

Sipas Komisionit të Disiplinës, skuadra është përfshirë në akte dhune ndaj futbollistëve kundërshtarë, të cilat kanë shkaktuar ndërprerjen përfundimtare të ndeshjes.

Për këtë arsye, Football Republic U-17 është dënuar me humbjen e takimit në tavolinë, me rezultatin 3-0, si dhe me gjobë nominale prej 300 mijë lekësh.

Megjithatë, sipas nenit 76/1/e, gjoba do të aplikohet në masën 3%, ose 9 mijë lekë.

Klubi është paralajmëruar gjithashtu se përsëritja e akteve të dhunës mund të sjellë masa disiplinore më të rënda.

Ndeshje të humbura në tavolinë dhe gjashtë muaj pezullim

AK Lefter Millo është dënuar për braktisjen e ndeshjes kundër Turbinës në Kategorinë e Tretë. Klubi e humbet takimin 3-0 në tavolinë, ndërsa gjoba nominale prej 100 mijë lekësh do të zbatohet në masën 3%, ose 3 mijë lekë.

Një tjetër vendim i rëndësishëm është marrë ndaj Rinia EL U-14, që ka aktivizuar një futbollist pa të drejtë loje kundër FC Bulqiza U-14.

Përveç humbjes së ndeshjes 3-0 në tavolinë, zyrtari Edison Merjo është dënuar me gjashtë muaj pezullim nga aktiviteti.

Edhe dy ekipe të tjera të moshave kanë marrë humbje në tavolinë për braktisje të ndeshjeve:

  • Dinamo 14 A U-9: Humbje 3-0 kundër Football Republic D U-9 dhe gjobë nominale 100 mijë lekë, e reduktuar në 3 mijë lekë.

  • AP Dinamo Junior U-11: Humbje 3-0 kundër BS East Park U-11 dhe gjobë nominale 100 mijë lekë, e reduktuar në 3 mijë lekë.

Rrëzohen tri kërkesa, klubet kanë të drejtë apelimi

Komisioni i Disiplinës ka vendosur gjithashtu të rrëzojë si të pabazuara në Kodin e Disiplinës dhe Etikës kërkesat e paraqitura nga Mateo Kurti i FC Kinostudio, Endrit Çako i SH.S Albpetrol dhe klubi Eagle Football.

Sipas vendimit të FSHF-së, palët kanë të drejtë të paraqesin ankim pranë Komisionit të Apelit brenda tri ditëve.