Finlanda përmbysi Shqipërinë dhe fitoi 2-1 në Helsinki, në një ndeshje që ndryshoi pas përjashtimit të Etrit Berishës. Kuqezinjtë mbetën me dhjetë lojtarë në minutën e 22-të, ndërsa vendasit realizuan të dy golat nga goditjet e dënimit.
Zëvendëskapiteni finlandez, Joel Pohjanpalo, e lidhi episodin vendimtar me presionin e ushtruar nga skuadra e tij ndaj lojtarëve shqiptarë që nisnin aksionet nga prapavija.
“E fituam me meritë kartonin e kuq. Situata u krijua falë presionit tonë”, deklaroi sulmuesi pas ndeshjes.
“Rezultati është ai që ka rëndësi”
Pohjanpalo pranoi se Finlanda nuk e menaxhoi menjëherë siç duhej epërsinë numerike. Sipas tij, prania e disa lojtarëve të rinj ndikoi në qarkullimin e topit dhe në mënyrën se si vendasit sulmuan nga krahët.
“Pas kartonit të kuq kishim në fushë disa lojtarë të rinj dhe në disa momente u treguam të ngathët. Kontrolli i topit në të dy krahët nuk ishte në nivelin që dëshironim”, shpjegoi ai.
Pavarësisht problemeve në lojë, sulmuesi vlerësoi karakterin e skuadrës dhe rëndësinë e tri pikëve.
“Arritëm të shënonim dy gola dhe në këtë nivel rezultati është ai që ka rëndësi. Jam krenar për skuadrën, sepse të gjithë dhanë maksimumin. Edhe atmosfera ishte krejt tjetër nga ajo e ndeshjes kundër Bjellorusisë”, përfundoi Pohjanpalo.




