Humbja 2-1 ndaj Finlandës la pas edhe polemika për arbitrimin. Kuqezinjtë pretenduan për një penallti në pjesën e dytë, pas kontaktit ndaj Myrto Uzunit brenda zonës, por gjyqtari Rob Hennessy lejoi vazhdimin e lojës.
Arbitri irlandez nuk u thirr nga VAR-i për ta rishikuar episodin në monitor. Vendimi shkaktoi pakënaqësi te lojtarët dhe stafi teknik i Shqipërisë, ndërsa Rolando Maran e konsideroi të qartë ndërhyrjen ndaj Uzunit.
Në ndeshjen e radhës kundër San Marinos do të jetë i pranishëm një tjetër zyrtar irlandez. UEFA ka caktuar John Ward si vëzhgues të arbitrave për takimin që do të luhet në “Air Albania”.
Ward është ish-gjyqtar anësor dhe ka punuar në sektorin e arbitrimit pranë Federatës Irlandeze, duke kontribuar në përgatitjen dhe zhvillimin e arbitrave të rinj.
Prania e tij krijon mundësinë që përfaqësuesit kuqezi të diskutojnë edhe për episodin e shumëdebatuar në Helsinki. Çdo ankesë zyrtare, gjithsesi, duhet të ndiqet nga FSHF-ja përmes kanaleve përkatëse të UEFA-s.




