Julian Shehu ka vlerësuar ndryshimet që trajneri Rolando Maran ka sjellë në lojën e Kombëtares shqiptare. Mesfushori kuqezi beson se qasja më sulmuese dhe presioni më i madh ndaj kundërshtarit kanë dhënë rezultate pozitive, ndërsa objektivi mbetet përfundimi i grupit të Ligës së Kombeve në vendin e parë.
Në konferencën për shtyp nga “Shtëpia e Futbollit”, Shehu foli për përballjet me Finlandën më 12 nëntor dhe Bjellorusinë më 15 nëntor, konkurrencën për një vend në formacion dhe rëndësinë e mbështetjes së tifozëve.
Ndryshimet e Maran, Shehu: Loja sulmuese ka dhënë frytet e veta
Mesfushori vlerësoi filozofinë e trajnerit italian, i cili ka kërkuar një Shqipëri më aktive në fazën sulmuese dhe më agresive në presionin ndaj kundërshtarit.
“Unë mendoj se mënyra si po luan ekipi më ofensiv ka dhënë frytet e veta. E rëndësishme është të ndihemi mirë dhe të respektojmë detyrat që na jep trajneri”, deklaroi Shehu.
Sipas tij, kërkesat taktike kanë ndryshuar për të gjithë skuadrën dhe jo vetëm për repartin e mesfushës.
“Besoj që detyrat kanë ndryshuar për të gjithë ekipin. Të bëjmë presion më tepër”, shtoi futbollisti kuqezi.
Dy finalet e Nations League, Shqipëria synon kreun
Shqipëria përgatitet për dy ndeshjet e fundit të grupit, ku rezultatet ndaj Finlandës dhe Bjellorusisë do të jenë vendimtare për renditjen përfundimtare.
Shehu theksoi se skuadra është e vetëdijshme për rëndësinë e këtyre përballjeve, por nuk duhet të nënvlerësojë asnjërin kundërshtar.
“Unë besoj se çdo ndeshje ka vështirësinë e vet. Duhet të japim maksimumin. Presioni është pjesë e lojës. Jemi profesionistë dhe dimë si ta përballojmë”, u shpreh ai.
Mesfushori konfirmoi se ambicia e kuqezinjve është e qartë.
“Ta bëjmë lojën për të marrë rezultatin maksimal. Patjetër që është objektiv të jemi në krye”, deklaroi Shehu.
Finlanda në Tiranë, Shehu kërkon mbështetjen e tifozëve
Pas përballjes së mëparshme në transfertë, Shqipëria do të presë Finlandën më 12 nëntor, këtë herë përpara publikut kuqezi.
Për Shehun, faktori fushë është një element që mund ta ndihmojë skuadrën të marrë rezultatin e dëshiruar.
“I vetmi ndryshim është se luajmë në shtëpi. Suporti i tifozëve është një shtysë e madhe për ne që të marrim maksimumin nga kjo lojë”, theksoi mesfushori.
Humbja e vendit të titullarit, Shehu: Vendimet i merr trajneri
Shehu u pyet edhe për ndryshimin e rolit të tij në Kombëtare, pasi gjatë periudhës së Sylvinhos kishte qenë pjesë e formacionit titullar.
Mesfushori shmangu polemikat dhe theksoi se zgjedhjet për formacionin i përkasin trajnerit, ndërsa futbollistët duhet të jenë të gatshëm sa herë u jepet mundësia.
“Këto janë zgjedhje që i bën trajneri. Për aq kohë sa je në ekipin kombëtar, do japim maksimumin. Sa herë jemi në fushë do bëjmë maksimumin”, deklaroi ai.
Shqipëria do të përballet me Finlandën më 12 nëntor, në orën 20:45, në “Air Albania”, ndërsa tri ditë më vonë do të luajë ndaj Bjellorusisë në Budapest.
Dy sfidat do të përcaktojnë nëse kuqezinjtë do ta realizojnë objektivin për ta mbyllur grupin e Ligës së Kombeve në vendin e parë.




