TË FUNDIT
Kthehu te lajmet
Kombëtare

Sherri humbet ndeshjen me San Marinon, Taho thirret te Kombëtarja

Shqipëria ka përfunduar përgatitjet për ndeshjen e sotme ndaj San Marinos, por Rolando Maran është detyruar të bëjë ndryshime të tjera në grup.

Sherri humbet ndeshjen me San Marinon, Taho thirret te Kombëtarja

Shqipëria ka përfunduar përgatitjet për ndeshjen e sotme ndaj San Marinos, por Rolando Maran është detyruar të bëjë ndryshime të tjera në grup. Alen Sherri nuk është rikuperuar nga shqetësimi muskulor, ndërsa në vend të tij është thirrur portieri i Kombëtares U-21, Alain Taho.

Kuqezinjtë zhvilluan seancën e fundit në stadiumin “Air Albania”, ku stafi teknik punoi kryesisht mbi organizimin taktik dhe situatat që pritet të paraqiten gjatë ndeshjes.

Ismajli stërvitet i diferencuar

Pothuajse i gjithë grupi zhvilloi normalisht seancën, e cila zgjati rreth një orë. Ardian Ismajli ndoqi një program të diferencuar për shkak të ngarkesës së akumuluar në tri ndeshjet e fundit.

Gjendja e mbrojtësit nuk paraqet shqetësim serioz dhe ai pritet të jetë në dispozicion të trajnerit për përballjen me San Marinon.

Taho bashkohet me ekipin e parë

Sherri iu nënshtrua kontrolleve mjekësore pas problemeve muskulore të shfaqura në transfertën ndaj Finlandës. Ekzaminimet treguan se portieri nuk është në gjendjen e duhur për të luajtur.

Në mungesë të tij dhe të Etrit Berishës së pezulluar, Maran ka afruar Alain Tahon nga Kombëtarja U-21. Portieri 19-vjeçar do të jetë për herë të parë pjesë e ekipit A.

Fetai rikthehet pas problemeve me dokumentacionin

Ndryshimi tjetër lidhet me Feta Fetain. Mesfushori ishte larguar për t’iu bashkuar Shqipërisë U-21, por nuk mundi të udhëtonte drejt Hungarisë për miqësoren ndaj Ukrainës për shkak të problemeve me dokumentacionin e qëndrimit në zonën Shengen.

Fetai është rikthyer te Kombëtarja A dhe do të jetë sërish në dispozicion të Maranit, megjithëse vendimi për përfshirjen e tij në listën përfundimtare të ndeshjes i takon trajnerit.

Shqipëri-San Marino do të luhet sot në orën 20:45, në stadiumin “Air Albania”. Kuqezinjtë kërkojnë fitoren për t’u rikthyer menjëherë pas humbjes 2-1 ndaj Finlandës.