Shqipëria mund ta mbyllë Grupin C1 të Ligës së Kombeve në vendin e parë duke marrë vetëm dy pikë në dy ndeshjet e mbetura. Megjithatë, ky skenar i pazakontë varet edhe nga rezultati i Bjellorusisë ndaj San Marinos, që do të luhet më 12 nëntor, paralelisht me përballjen e kuqezinjve kundër Finlandës.
Skuadra e Rolando Maran kryeson grupin me nëntë pikë pas katër ndeshjeve, ndërsa Bjellorusia dhe Finlanda e ndjekin me nga shtatë. Dy takimet e fundit, ndaj Finlandës në “Air Albania” dhe Bjellorusisë në transfertë, do të përcaktojnë fatin e vendit të parë.
Dy barazime dhe Shqipëria mund të fitojë grupin
Skenari më interesant është ai ku Shqipëria barazon të dyja ndeshjet e mbetura, ndërsa Bjellorusia dhe Finlanda fitojnë përballë San Marinos.
Në këtë rast, të tria kombëtaret do ta përfundonin grupin me nga 11 pikë.
Renditja do të përcaktohej nga rezultatet e ndeshjeve direkte mes tri skuadrave, ku Shqipëria do të kishte avantazhin e diferencës së golave.
Kuqezinjtë kanë fituar 2-0 ndaj Bjellorusisë dhe kanë humbur 2-1 në Finlandë. Nëse dy përballjet e mbetura përfundojnë në barazim, Shqipëria do të kishte diferencën më të mirë të golave në miniklasifikimin mes tri pretendenteve.
Kështu, dy pikë do të mjaftonin për ta mbyllur grupin në vendin e parë.
Pse Shqipërisë i intereson fitorja e Bjellorusisë?
Në pamje të parë duket e çuditshme, por nëse Shqipëria barazon ndaj Finlandës, një fitore e Bjellorusisë kundër San Marinos do të ishte e favorshme për skenarin e dy barazimeve.
Nëse Bjellorusia nuk fiton, ndërsa Finlanda mposht San Marinon në ndeshjen e fundit, situata ndryshon.
Me dy barazime, Shqipëria do të arrinte në 11 pikë, po aq sa Finlanda. Në këtë rast, finlandezët do të kishin avantazhin në ndeshjet direkte, pasi fituan përballjen e parë 2-1.
Për këtë arsye, Shqipërisë nuk do t'i mjaftonte barazimi në ndeshjen e fundit ndaj Bjellorusisë për të siguruar kreun.
Tri pikë mund të mos mjaftojnë
Një tjetër paradoks lidhet me mundësinë që Shqipëria të marrë tri pikë në dy ndeshjet e mbetura.
Nëse kuqezinjtë fitojnë njërën përballje dhe humbasin tjetrën, do ta mbyllin grupin me 12 pikë.
Por skuadra që mposht Shqipërinë mund të arrijë në 13 pikë, nëse fiton edhe ndeshjen ndaj San Marinos.
Kështu, në varësi të rezultateve të rivalëve, dy barazime mund t'i sigurojnë Shqipërisë vendin e parë, ndërsa një fitore dhe një humbje mund të mos jenë të mjaftueshme.
Gjithçka nis me Finlandën
Shqipëria do të presë Finlandën më 12 nëntor, në orën 20:45, në stadiumin “Air Albania”, ndërsa Bjellorusia do të luajë në transfertë ndaj San Marinos.
Rezultatet e këtyre dy ndeshjeve do të përcaktojnë skenarët përfundimtarë për kreun e grupit.
Kuqezinjtë e kanë fatin në duart e tyre, por llogaritë tregojnë se jo gjithmonë numri më i madh i pikëve të marra në dy ndeshjet e fundit garanton një përfundim më të mirë.




