Shqipëria po kalon një moment pozitiv nën drejtimin e Rolando Maranit. Fitorja 2-0 ndaj Finlandës ka konfirmuar përmirësimin e kuqezinjve, të cilët jo vetëm po marrin rezultate, por po spikasin edhe për lojën sulmuese në këtë edicion të Ligës së Kombeve.
Statistikat e pesë ndeshjeve të para e rendisin Kombëtaren shqiptare mes skuadrave më aktive në fazën ofensivë, duke lënë pas edhe disa prej emrave më të mëdhenj të futbollit europian.
Shqipëria e treta për sulmet e krijuara
Një nga treguesit më domethënës të ndryshimit të Shqipërisë është numri i sulmeve të krijuara.
Sipas statistikave të këtij edicioni të Ligës së Kombeve, kuqezinjtë renditen në vendin e tretë mes të gjitha përfaqësueseve të kompeticionit për këtë tregues, duke u pozicionuar vetëm pas Armenisë dhe Malit të Zi.
Kjo renditje përfshin skuadrat e të gjitha ligave dhe pasqyron qasjen më sulmuese që Shqipëria ka shfaqur nën drejtimin e teknikut italian.
Maran ka arritur të ndërtojë një skuadër që kërkon vazhdimisht portën kundërshtare dhe krijon mundësi shënimi, duke mos u kufizuar vetëm te organizimi mbrojtës.
92 goditje dhe 10 gola në pesë ndeshje
Statistikat e tentativave drejt portës janë një tjetër tregues i ecurisë së kuqezinjve.
Në pesë ndeshjet e para të Ligës së Kombeve, Shqipëria ka regjistruar 92 tentativa drejt portës kundërshtare, me një mesatare prej 18.4 goditjesh për takim.
Kjo shifër e vendos përfaqësuesen shqiptare mes skuadrave me aktivitetin më të lartë ofensiv në kompeticion, në shoqërinë e kombëtareve si Holanda dhe Gjermania, ndërsa për këtë tregues ka lënë pas Anglinë dhe Spanjën.
Prodhimtaria në sulm është shoqëruar edhe me gola. Shqipëria ka realizuar 10 herë në pesë ndeshje, duke regjistruar një mesatare prej dy golash për takim.
Efekti Maran, Shqipëria ndryshon fytyrë
Përtej rezultateve, statistikat tregojnë ndryshimin në mënyrën se si Shqipëria po i zhvillon ndeshjet.
Skuadra e Maranit po shfaq më shumë iniciativë në fazën sulmuese, duke krijuar raste dhe duke ushtruar presion mbi kundërshtarët.
Fitorja ndaj Finlandës ishte një tjetër dëshmi e kësaj qasjeje, me kuqezinjtë që siguruan tri pikë të rëndësishme falë golave të Ernest Muçit dhe Rey Manajt.
Pas pesë ndeshjeve, Shqipëria kryeson Grupin C1 me 12 pikë, katër fitore dhe vetëm një humbje.
Tashmë, kuqezinjtë kanë mundësinë ta kurorëzojnë këtë ecuri me vendin e parë dhe ngjitjen direkte në Ligën B. Për këtë objektiv, u mjafton një barazim në përballjen e fundit ndaj Bjellorusisë.




