Vetëm pak orë përpara ndeshjes hapëse të Ligës së Kombeve, vëmendja kthehet edhe te historia e përballjeve mes Shqipërisë dhe Bjellorusisë.
Bilancet nuk vendosin rezultatin në fushë, por tregojnë zhvillimin e dy skuadrave dhe mënyrën se si ka ndryshuar raporti i forcave ndër vite.
Shqipëria dhe Bjellorusia janë përballur shtatë herë. Kuqezinjtë kanë regjistruar tri fitore, dy barazime dhe dy humbje. Statistika më pozitive për Kombëtaren është se nuk ka humbur asnjë nga katër takimet e fundit.
Nga dy humbje te katër ndeshje pa disfatë
Përballja e parë u zhvillua më 2 shtator 2006 në Minsk, gjatë kualifikueseve të Kampionatit Europian. Ndeshja përfundoi në barazim 2-2.
Një vit më vonë, Bjellorusia fitoi 4-2 në Shqipëri. Kuqezinjtë drejtoheshin në atë periudhë nga Otto Barić.
Humbja e dytë dhe e fundit erdhi më 12 tetor 2010. Bjellorusët triumfuan 2-0 në Minsk, në eliminatoret e Euro 2012.
Shqipëria reagoi në ndeshjen e kthimit. Më 26 mars 2011, kuqezinjtë fituan 1-0 në Tiranë dhe nisën serinë pozitive që vazhdon edhe sot.
Që prej asaj date, Kombëtarja ka regjistruar tri fitore dhe një barazim ndaj Bjellorusisë.
Dy fitore në Ligën e Kombeve 2020
Dy përballjet më të fundit u zhvilluan në vitin 2020, pikërisht në Ligën e Kombeve.
Shqipëria, që drejtohej nga Edoardo Reja, fitoi fillimisht 2-0 në Minsk. Kuqezinjtë triumfuan edhe në takimin e kthimit në “Air Albania”, këtë herë me rezultatin 3-2.
Edhe atëherë në pankinë ishte një trajner italian. Gjashtë vjet më pas, Rolando Maran synon të vazhdojë serinë pozitive dhe të sigurojë fitoren e parë si trajner i Shqipërisë.
Historiku Shqipëri-Bjellorusi
- 2 shtator 2006: Bjellorusi 2-2 Shqipëri, kualifikueset e Europianit
- 17 nëntor 2007: Shqipëri 2-4 Bjellorusi, kualifikueset e Europianit
- 12 tetor 2010: Bjellorusi 2-0 Shqipëri, kualifikueset e Europianit
- 26 mars 2011: Shqipëri 1-0 Bjellorusi, kualifikueset e Europianit
- 15 nëntor 2013: Bjellorusi 0-0 Shqipëri, miqësore
- 4 shtator 2020: Bjellorusi 0-2 Shqipëri, Liga e Kombeve
- 18 nëntor 2020: Shqipëri 3-2 Bjellorusi, Liga e Kombeve
Bilanci i përgjithshëm: 3 fitore të Shqipërisë, 2 barazime dhe 2 fitore të Bjellorusisë.




