Humbja 2-1 në Helsinki e ka zbritur Shqipërinë pas Finlandës në Grupin C1, por gara për vendin e parë mbetet plotësisht e hapur. Kuqezinjtë kanë edhe tri ndeshje për të luajtur dhe me nëntë pikë do ta siguronin kreun pa pasur nevojë për llogari të tjera.
Hapi i parë duhet të hidhet sot ndaj San Marinos. Fitorja është detyrim, ndërsa një rezultat i thellë mund të krijojë një avantazh të vlefshëm në rast se renditja përfundimtare kërkon përdorimin e golavarazhit të përgjithshëm.
Shqipëria shënoi më pak se rivalët
Finlanda e mposhti San Marinon 7-0, ndërsa Bjellorusia fitoi 4-0. Shqipëria, në transfertën e Serravalles, u mjaftua me një sukses 3-0.
Kuqezinjtë realizuan dy herë në pjesën e parë, por ulën ritmin pas pushimit dhe lejuan kundërshtarin të krijonte disa mundësi. Në vend që të zgjeronte rezultatin, skuadra e Rolando Maranit rrezikoi të pësonte gol.
Pas tri ndeshjeve, Finlanda ka shënuar nëntë gola dhe ka pësuar vetëm një. Shqipëria numëron gjashtë realizime dhe dy gola të pësuar, ndërsa Bjellorusia ka një bilanc 4-2.
Përballjet direkte kanë përparësi
Golavarazhi i përgjithshëm mund të jetë i rëndësishëm, por nuk është kriteri i parë që UEFA përdor kur dy ose më shumë skuadra e mbyllin grupin me pikë të barabarta.
Fillimisht llogariten pikët e marra në përballjet direkte, më pas golavarazhi dhe numri i golave në këto takime. Vetëm nëse barazia vazhdon, merret parasysh golavarazhi i përgjithshëm në grup.
Kjo e bën vendimtar duelin Shqipëri-Finlandë të 12 nëntorit. Kuqezinjtë e humbën ndeshjen e parë 2-1, ndaj një fitore me të paktën dy gola diferencë në Tiranë do t’u jepte epërsinë në përballjet direkte.
San Marino mbetet mundësia për të përmirësuar shifrat
Para dueleve të nëntorit me Finlandën dhe Bjellorusinë, Shqipëria ka edhe një mundësi për të përmirësuar bilancin ofensiv. Kundër San Marinos nuk kërkohen vetëm tri pikët, por një paraqitje bindëse dhe sa më shumë gola.
Një goleada nuk e zgjidh vetë çështjen e vendit të parë, por mund të vlejë nëse përballjet direkte dhe pikët nuk mjaftojnë për të ndarë skuadrat.
Paralelisht, kuqezinjtë do të ndjekin edhe ndeshjen Bjellorusi-Finlandë. Çdo ndalesë e nordikëve do t’i jepte Shqipërisë mundësinë të rikthehej menjëherë në krye, me kusht që të bëjë detyrën në “Air Albania”.




