TË FUNDIT
Kthehu te lajmet
Kombëtare

Shqipëria me portier të ri ndaj San Marinos, Maran kërkon përqendrim maksimal

Rolando Maran nuk pranon ta cilësojë të lehtë ndeshjen e Shqipërisë ndaj San Marinos. Trajneri kuqezi kërkon përqendrim maksimal, duke kujtuar vështirësitë që skuadra krijoi vetë gjatë disa momenteve të takimit të parë.

Shqipëria me portier të ri ndaj San Marinos, Maran kërkon përqendrim maksimal

Rolando Maran nuk pranon ta cilësojë të lehtë ndeshjen e Shqipërisë ndaj San Marinos. Trajneri kuqezi kërkon përqendrim maksimal, duke kujtuar vështirësitë që skuadra krijoi vetë gjatë disa momenteve të takimit të parë.

“Kur dëgjoj fjalën ‘e lehtë’, më vijnë drithërimat. Mund të ketë ndeshje më pak ose më shumë të lodhshme, por të lehta nuk ekzistojnë. Në San Marino ulëm ritmin për 15 minuta dhe rrezikuam të pësonim. Çdo kundërshtar mund të të vendosë në vështirësi nëse ti i krijon hapësira”, deklaroi italiani.

Maran vlerëson rritjen e skuadrës

Pavarësisht humbjes 2-1 në Helsinki, trajneri mendon se Shqipëria ka treguar përmirësim gjatë kësaj serie të Ligës së Kombeve. Ai vlerësoi veçanërisht reagimin e skuadrës, e cila luajti për një kohë të gjatë me dhjetë futbollistë ndaj Finlandës.

“Progresi ka qenë i dukshëm. Në ndeshjen e parë me San Marinon administruam energjitë pasi na priste Finlanda. Ajo punë u pa në Helsinki, sepse diferenca numerike pothuajse nuk u ndie. Lojtarët kanë treguar përkushtim të jashtëzakonshëm në çdo stërvitje dhe analizë”, shpjegoi Maran.

Tekniku italian theksoi se brenda grupit është krijuar një marrëdhënie e fortë dhe një dëshirë e përbashkët për t’u përmirësuar.

Berisha i pezulluar, Sherri i dëmtuar

Shqipëria do të ketë ndryshim të detyruar në portë. Etrit Berisha është i pezulluar pas kartonit të kuq ndaj Finlandës, ndërsa Alen Sherri ka pësuar një problem muskulor.

Maran i doli në mbrojtje dy portierëve pas gabimeve që sollën golat e Finlandës, duke theksuar se pozicioni i tyre ekspozon më shumë çdo pasaktësi.

“Të gjithë gabojmë, duke nisur nga unë. Kur gabon një portier, pasojat janë më të dukshme dhe shpesh vendimtare. Duhet t’i mbështesim, sepse kam besim të plotë tek ata”, tha trajneri.

Në mungesë të Berishës dhe Sherrit, ndaj San Marinos do të luajë Mario Dajsinani.

“Më vjen keq që nuk do t’i kemi, por Mario do ta marrë këtë mundësi. Kam shumë besim tek ai”, përfundoi Maran.