TË FUNDIT
Kthehu te lajmet
Kombëtare

Shqipëria mposht Finlandën, magjia e Muçit dhe goli i Manajt afrojnë kuqezinjtë me Ligën B

Shqipëria hedh një tjetër hap të madh drejt rikthimit në Ligën B.

Shqipëria mposht Finlandën, magjia e Muçit dhe goli i Manajt afrojnë kuqezinjtë me Ligën B

Shqipëria hedh një tjetër hap të madh drejt rikthimit në Ligën B të Ligës së Kombeve. Kuqezinjtë triumfuan 2-0 ndaj Finlandës në “Air Albania”, falë një supergoli të Ernest Muçit dhe një goditjeje të saktë me kokë të Rey Manajt. Me këtë sukses, Kombëtarja blindon kreun e Grupit C1 me 12 pikë pas katër ndeshjesh.

Muçi ndez “Air Albania” me një supergol

Shqipëria e nisi takimin me synimin për të marrë kontrollin e lojës dhe krijoi rastin e parë që në minutën e parë. Pas një pasimi të Pilos, Laçi provoi të gjente portën, por gjuajtja e tij përfundoi jashtë kuadratit.

Kuqezinjtë vijuan të ushtronin presion, me Asllanin dhe Muçin që kërkuan të zhbllokonin rezultatin. Momenti vendimtar erdhi në minutën e 35-të, kur Ernest Muçi dhuroi një perlë të vërtetë.

Sulmuesi mori topin në krahun e djathtë dhe, me një goditje spektakolare me të jashtmen, e dërgoi në rrjetë, duke ngritur në këmbë tifozët në “Air Albania”.

Fiilanda u përpoq të reagonte, kryesisht përmes goditjeve standarde. Në minutën e 42-të, Tenho rrezikoi seriozisht me kokë, por Etrit Berisha realizoi një pritje fantastike, duke ruajtur avantazhin deri në përfundim të pjesës së parë.

Manaj dyfishon, Finlanda mbetet me 10 lojtarë

Pjesa e dytë nisi në mënyrën më të mirë për Shqipërinë. Në minutën e 50-të, Elseid Hysaj dërgoi një krosim të shkëlqyer nga krahu i djathtë, ndërsa Rey Manaj u shkëput nga mbrojtësit dhe goditi saktë me kokë, duke dyfishuar rezultatin.

Vetëm katër minuta më vonë, Manaj pati mundësinë të shënonte sërish, por këtë herë nuk arriti të gjente kuadratin.

Shqipëria vazhdoi të kontrollonte lojën dhe të kërkonte golin e tretë, ndërsa situata për finlandezët u vështirësua edhe më shumë në minutën e 67-të.

Tenho u ndëshkua me karton të kuq pas një ndërhyrjeje të rëndë ndaj Muçit, i cili po nisej në kundërsulm, duke e lënë Finlandën me dhjetë lojtarë.

Në minutën e 73-të, Laçi provoi të thellonte avantazhin, ndërsa pesë minuta më vonë Suhoinen rrezikoi për miqtë. Gjithsesi, kuqezinjtë administruan me qetësi epërsinë dhe e mbyllën takimin me një fitore të pastër 2-0.

Shqipëria një hap larg Ligës B, vendimtare sfida me Bjellorusinë

Triumfi ndaj Finlandës e ngjit Shqipërinë në kuotën e 12 pikëve pas katër ndeshjesh, duke përforcuar pozitat në krye të Grupit C1 të Ligës së Kombeve.

Tashmë, vëmendja zhvendoset te përballja direkte me Bjellorusinë, që do të zhvillohet në Hungari. Një barazim në këtë sfidë do t'u mjaftonte kuqezinjve për të përmbushur objektivin e këtij edicioni dhe për të siguruar rikthimin në Ligën B.

REZULTATI FINAL

Shqipëri 2-0 Finlandë

⚽ Ernest Muçi 35'

⚽ Rey Manaj 50'