TË FUNDIT
Kthehu te lajmet
Kombëtare

Shqipëria nuk gabon në San Marino, tri gola dhe kreu i grupit me pikë të plota

Shqipëria ka marrë fitoren e dytë radhazi në Ligën e Kombeve. Kuqezinjtë triumfuan 3-0 në Serravalle ndaj San Marinos, duke ruajtur kreun e Grupit 1 të Ligës C me gjashtë pikë.

Shqipëria nuk gabon në San Marino, tri gola dhe kreu i grupit me pikë të plota

Shqipëria ka marrë fitoren e dytë radhazi në Ligën e Kombeve. Kuqezinjtë triumfuan 3-0 në Serravalle ndaj San Marinos, duke ruajtur kreun e Grupit 1 të Ligës C me gjashtë pikë.

Anis Mehmeti realizoi golin e tij të parë me Kombëtaren, ndërsa Myrto Uzuni dhe Rey Manaj u rikthyen te rrjeta. Mbrëmja ishte e veçantë edhe për Samuele Sinën, Klevi Qefalijan dhe Luis Hasën, të cilët debutuan me fanellën kuqezi.

Shqipëria e zgjidh ndeshjen që në pjesën e parë

Rolando Maran bëri disa ndryshime në formacion, por kjo nuk ndikoi në kontrollin e lojës. Samuele Sina e nisi takimin si titullar në krahun e djathtë të mbrojtjes, ndërsa Alen Sherri mori vendin mes shtyllave.

Kuqezinjtë ushtruan presion që në minutat e para dhe kaluan në avantazh në të 21-tën. Pas goditjes së këndit të Kristjan Asllanit dhe devijimit me kokë të Manajt, Mehmeti u gjend në vendin e duhur dhe e dërgoi topin në rrjetë.

Vetëm gjashtë minuta më vonë erdhi goli i dytë. Manaj provoi nga goditja e dënimit, portieri vendas e largoi topin, por Uzuni reagoi më shpejt se mbrojtësit dhe realizoi për 2-0.

Manaj vulos suksesin

Shqipëria e uli ritmin në pjesën e dytë, por vazhdoi ta kontrollonte ndeshjen pa i dhënë San Marinos mundësi të rikthehej në lojë.

Në minutën e 65-të, Manaj kaloi nga roli i asistuesit te ai i golashënuesit. Sulmuesi realizoi golin e tretë dhe mbylli përfundimisht llogaritë e takimit.

Maran shfrytëzoi minutat e mbetura për t’u dhënë hapësirë edhe lojtarëve të rinj. Klevi Qefalija u aktivizua në minutën e 74-t, ndërsa Luis Hasa hyri gjashtë minuta më vonë, duke regjistruar të dy debutimin me Kombëtaren.

Kuqezinjtë shkëputen në krye

Pas fitores 2-0 ndaj Bjellorusisë në ndeshjen e parë, Shqipëria shtoi edhe tri pikë të tjera në San Marino. Kuqezinjtë kryesojnë grupin me gjashtë pikë dhe pa pësuar gol.

Barazimi 0-0 mes Finlandës dhe Bjellorusisë favorizoi skuadrën e Maranit. Finlanda mbetet dy pikë pas Shqipërisë, ndërsa përballja direkte mes dy skuadrave merr tashmë një rëndësi edhe më të madhe.

Shqipëria e kaloi pa probleme pengesën e San Marinos, por prova e vërtetë për kreun e grupit do të vijë në transfertën ndaj Finlandës.