TË FUNDIT
Kthehu te lajmet
Kategoria Superiore

Superiorja ndryshon pamje, Teuta mban kreun dhe Partizani fundoset në fund të renditjes

Java e tetë e “Abissnet Superiore” ka sjellë lëvizje në klasifikim.

Superiorja ndryshon pamje, Teuta mban kreun dhe Partizani fundoset në fund të renditjes

Java e tetë e “Abissnet Superiore” ka sjellë lëvizje në klasifikim, me Teutën që ruan vendin e parë dhe Partizanin që vazhdon të zhgënjejë. Katër ndeshjet e zhvilluara këtë të shtunë prodhuan tri fitore dhe një barazim, ndërsa përballja Dinamo-Egnatia mbetet për t'u luajtur.

Skënderbeu, Laçi dhe Vllaznia morën nga tri pikë, duke përmirësuar pozitat e tyre në tabelë. Ndërkohë, Teuta u ndal në barazim nga Elbasani, por vazhdon të kryesojë kampionatin.

Teuta kryeson, Egnatia ka mundësinë të marrë vendin e parë

Durrsakët mbajnë kreun e Superiores me 20 pikë pas tetë javësh, falë gjashtë fitoreve dhe dy barazimeve. Teuta mbetet gjithashtu skuadra e vetme pa humbje në këtë sezon.

Në vendin e dytë renditet Egnatia me 18 pikë, por kampionët në fuqi kanë zhvilluar një ndeshje më pak. Një fitore ndaj Dinamos do t'i ngjiste rrogozhinasit në krye të klasifikimit.

Dinamo City mban vendin e tretë me 12 pikë, ndërsa Tirana renditet e katërta me 11 pikë, pas humbjes 2-0 në Shkodër kundër Vllaznisë.

Laçi dhe Skënderbeu ngjiten, tri skuadra me nga tetë pikë

Fitorja 1-0 ndaj Vorës i ka mundësuar Laçit të ngjitet në vendin e pestë me 10 pikë. Kurbinasit lanë pas rezultatet negative dhe morën një sukses të rëndësishëm për vazhdimësinë e kampionatit.

Skënderbeu gjithashtu përfitoi nga java e tetë. Korçarët mposhtën Partizanin 2-0 dhe u ngjitën në vendin e gjashtë me nëntë pikë.

Më poshtë, Elbasani, Vllaznia dhe Vora kanë nga tetë pikë. Verdheblutë mbajnë vendin e shtatë, të ndjekur nga shkodranët dhe skuadra vorake.

Partizani i fundit, vetëm katër pikë në tetë javë

Situata më e vështirë është ajo e Partizanit. Të kuqtë pësuan një tjetër humbje, këtë herë përballë Skënderbeut, duke mbetur në fund të renditjes me vetëm katër pikë.

Skuadra kryeqytetase ka regjistruar një fitore, një barazim dhe gjashtë humbje në tetë javët e para. Me nëntë gola të shënuar dhe 19 të pësuar, Partizani ka edhe golavarazhin më negativ në kampionat.

Ndryshimi i trajnerit dhe ardhja e Mislav Karoglanit nuk kanë sjellë ende reagimin e pritur, ndërsa diferenca me skuadrat që ndodhen sipër tij vazhdon të jetë e konsiderueshme.

Dinamo-Egnatia mund të ndryshojë kreun

Java e tetë do të plotësohet më 25 tetor, me përballjen mes Dinamo City dhe Egnatias, që do të zhvillohet në stadiumin “Elbasan Arena”, duke nisur nga ora 18:30.

Sfida ka rëndësi të veçantë për renditjen. Egnatia do të kërkojë tri pikët që do ta ngjisnin mbi Teutën, ndërsa Dinamo synon të afrohet me dy skuadrat kryesuese.

Renditja e Superiores pas ndeshjeve të së shtunës

Poz.

Skuadra

N

Pikë

1

Teuta

8

20

2

Egnatia

7

18

3

Dinamo City

7

12

4

Tirana

8

11

5

Laçi

8

10

6

Skënderbeu

8

9

7

Elbasani

8

8

8

Vllaznia

8

8

9

Vora

8

8

10

Partizani

8

4