Java e nëntë e Abissnet Superiore, e fundit për fazën e parë të kampionatit, ka nisur me rezultate që kanë ndryshuar renditjen në pjesën e poshtme të tabelës. Partizani vazhdon të zhgënjejë, Vllaznia pëson një tjetër humbje, ndërsa Elbasani dhe Vora marrin fitore të rëndësishme.
Në krye mbetet Teuta me 20 pikë, e ndjekur nga Egnatia me 18 dhe Dinamo City me 15, tri skuadra që ende nuk i kanë zhvilluar ndeshjet e kësaj jave.
Partizani zhytet në krizë, Elbasani merr tri pikët
Situata e Partizanit rëndohet edhe më shumë pas humbjes 2-1 ndaj Elbasanit. Skuadra kryeqytetase nuk arrin të dalë nga seria e rezultateve negative dhe mbetet e fundit në klasifikim me vetëm 4 pikë pas nëntë javësh.
Nga ana tjetër, verdheblutë e drejtuar nga Glen Daja sigurojnë një fitore me peshë, duke u ngjitur në kuotën e 11 pikëve dhe në vendin e gjashtë.
Vora mposht Vllazninë, Laçi dhe Skënderbeu ndajnë pikët
Një tjetër rezultat i rëndësishëm erdhi nga përballja mes Vorës dhe Vllaznisë. Vendasit triumfuan 2-1 falë golave të Kasharit dhe Dakës, ndërsa për shkodranët shënoi Balaj nga penalltia në minutën e 90-të.
Skuadra e Arjan Bellait shkon në 11 pikë dhe renditet e shtata, ndërsa Vllaznia mbetet në vendin e nëntë me 8 pikë.
Ndërkohë, Skënderbeu dhe Laçi barazuan 1-1 në Korçë. Lagonidis kaloi vendasit në avantazh, por Traore riktheu baraspeshën për kurbinasit.
Laçi renditet i pesti me 11 pikë, ndërsa Skënderbeu mban vendin e tetë me 10 pikë.
Renditja e Superiores pas tri ndeshjeve të javës së nëntë
Poz. | Skuadra | Ndeshje | Pikë |
|---|---|---|---|
1 | Teuta | 8 | 20 |
2 | Egnatia | 8 | 18 |
3 | Dinamo City | 8 | 15 |
4 | Tirana | 8 | 11 |
5 | Laçi | 9 | 11 |
6 | AF Elbasani | 9 | 11 |
7 | Vora | 9 | 11 |
8 | Skënderbeu | 9 | 10 |
9 | Vllaznia | 9 | 8 |
10 | Partizani | 9 | 4 |
Katër skuadra kanë nga 11 pikë, duke e bërë veçanërisht të ngjeshur mesin e tabelës. Ndërkohë, diferenca mes Vllaznisë dhe Partizanit është katër pikë, me dy ekipet që mbyllin renditjen.
Java e nëntë do të plotësohet me dy përballjet e mbetura, të cilat mund të sjellin ndryshime të tjera në klasifikim.




