Java e gjashtë e “Abissnet Superiores” është mbyllur me derbin Partizani-Tirana dhe përballjen Vllaznia-Dinamo City. Rezultatet e fundit kanë sjellë ndryshime të rëndësishme në të dy skajet e renditjes.
Teuta vazhdon të kryesojë me 16 pikë pas fitores 2-0 ndaj Skënderbeut. Egnatia mbetet vetëm një pikë larg durrsakëve, pasi mposhti Laçin në transfertë me të njëjtin rezultat.
Dinamo humbi terren në garën për kreun pas disfatës 1-0 në Shkodër. Blutë mbeten në kuotën e 12 pikëve, katër më pak se Teuta.
Tirana ngjitet, Partizani në krizë
Tirana ishte skuadra që fitoi më shumë terren gjatë kësaj jave. Fitorja 3-1 në derbi e ngjiti skuadrën bardheblu në vendin e katërt me tetë pikë.
Në anën tjetër, Partizani vazhdon të zhytet në krizë. Të kuqtë kanë vetëm katër pikë pas gjashtë ndeshjeve dhe ndodhen në vendin e parafundit.
Tabela mbyllet nga Skënderbeu me tri pikë. Në zonën e rrezikut ndodhen edhe Vora dhe Vllaznia, megjithëse shkodranët morën fitoren e parë sezonale në debutimin e Csaba Laszlos.
Elbasani dhe Laçi pozicionohen në mesin e renditjes, ndërsa diferencat e vogla bëjnë që çdo rezultat të ndikojë ndjeshëm në klasifikim.




