Sylvinho hap zemrën për Shqipërinë: “Kjo marrëdhënie do të jetë e përjetshme”
Sylvinho e konsideron periudhën në drejtimin e Kombëtares shqiptare një nga kapitujt më të rëndësishëm të karrierës së tij. Në një intervistë për “Flashscore”, trajneri brazilian ka folur për rezultatet, punën në prapaskenë dhe lidhjen e krijuar me Shqipërinë.
Ish-trajneri kuqezi kujtoi edhe bisedën e parë me presidentin e FSHF-së, Armand Duka, përpara se të merrte drejtimin e ekipit.
“Presidenti ishte shumë i qartë kur na kontaktoi. Na tha se donte të shkonim atje dhe të jepnim më të mirën tonë, sepse besonte se mund ta bënim. Ne iu përgjigjëm: ‘Perfekt, le të shkojmë’”, tregoi Sylvinho.
Nga Euro 2024 te play-off-i i Botërorit
Nën drejtimin e brazilianit, Shqipëria fitoi grupin kualifikues të Euro 2024, duke lënë pas Çekinë dhe Poloninë. Kuqezinjtë siguruan më pas edhe vendin në play-off-in e Botërorit 2026, ku rrugëtimi u ndal përballë Polonisë.
Sylvinho shpjegoi se rezultatet ishin fryt i një pune intensive. Sipas tij, stafi punonte deri në 15 ose 16 orë në ditë, duke analizuar kundërshtarët dhe çdo detaj të lojës.
Puna e përditshme i ndihmoi futbollistët të besonin te projekti dhe të krijonin një marrëdhënie të fortë me trajnerin dhe ndihmësit e tij, Doriva dhe Pablo Zabaleta.
“Në Tiranë ndihesha si në shtëpi”
Braziliani veçoi lidhjen njerëzore që krijoi me lojtarët dhe njerëzit e zakonshëm gjatë qëndrimit në Shqipëri. Ai tregoi se njohja e italishtes e ndihmoi të komunikonte, ndërsa ngjashmëritë kulturore e bënë përshtatjen më të lehtë.
“Jemi latinë dhe amerikanojugorë. Na pëlqen kontakti, përqafimet, të ulemi bashkë dhe të pimë një kafe të mirë”, tha ai.
Sylvinho kujtoi edhe një episod në ambientet e FSHF-së, kur u ul për të pirë kafe dhe për të biseduar me një punonjës sigurie. Për të, këto momente të vogla kishin rëndësi në krijimin e raportit me vendin.
“Lojtarët më pyesnin nëse më pëlqente Tirana dhe nëse ndihesha rehat. U thosha se isha në shtëpi, me bashkëshorten time. Ndoshta nuk isha në Brazil, por jetoja mirë”, shtoi ai.
Një ndarje pa prishur lidhjen
Trajneri e përshkroi largimin si përfundimin natyral të një cikli. Pas bisedave me drejtuesit e FSHF-së, të dyja palët vlerësuan se kishte ardhur momenti për të vazhduar në drejtime të ndryshme.
“Marrëdhënia jonë me federatën dhe Shqipërinë do të jetë e përjetshme”, përfundoi Sylvinho.
52-vjeçari drejtoi Shqipërinë në 34 ndeshje, duke regjistruar 15 fitore, shtatë barazime dhe 12 humbje. Kualifikimi në Euro 2024 dhe arritja në play-off-in e Botërorit 2026 mbeten dy momentet kryesore të periudhës së tij në krye të kuqezinjve.




