Edlir Tetova është shpallur nga FSHF-ja trajneri më i mirë i muajit shtator në “Abissnet Superiore”. Vlerësimi vjen pas fillimit shumë të mirë të Teutës, e cila kryeson e vetme kampionatin.
Durrsakët e nisën sezonin me barazimin ndaj Partizanit, ndërsa më pas regjistruan katër fitore radhazi. Pas pesë javësh, Teuta ka grumbulluar 13 pikë, një më shumë se Egnatia dhe Dinamo.
Gjatë shtatorit, skuadra e Tetovës fitoi të tria ndeshjet e zhvilluara. Kjo ecuri bindi Drejtorinë Teknike të FSHF-së që t’ia jepte teknikut çmimin individual, i cili iu dorëzua nga drejtori teknik Abdyl Kuriu.
Tetova ia dedikoi vlerësimin stafit dhe futbollistëve, duke i cilësuar ata protagonistët kryesorë të rezultateve të arritura.
“Është një arritje për mua personalisht, por mbi të gjitha edhe për klubin. Pjesëmarrësit më të afërt janë stafi dhe lojtarët, sepse pa ta kjo nuk do të ishte e mundur. Dedikimi është për stafin dhe lojtarët”, deklaroi ai për faqen zyrtare të FSHF-së.
Pavarësisht rezultateve, trajneri mendon se Teuta nuk e ka shfaqur ende të gjithë potencialin e saj.
“Pesë ndeshjet e para kanë qenë pozitive për klubin tonë. Mendoj se nuk jemi në 100 për qind të potencialit. Shpresoj të kemi një ecuri edhe më të mirë në javët në vazhdim dhe sa më shumë tifozë në stadium”, përfundoi Tetova.
Teuta do të rikthehet në fushë më 10 tetor, kur do të presë Skënderbeun në ndeshjen e javës së gjashtë të kampionatit.




