TË FUNDIT
Kthehu te lajmet
Tjetër

Trajneri shqiptar mes tmerrit në Riad, ndodhej në aeroport gjatë sulmit me viktima

Trajneri shqiptar Besmir Shabani ndodhej në aeroportin ndërkombëtar “King Khalid” të Riadit në momentin e sulmit të regjistruar më 11 tetor.

Trajneri shqiptar mes tmerrit në Riad, ndodhej në aeroport gjatë sulmit me viktima

Trajneri shqiptar Besmir Shabani ndodhej në aeroportin ndërkombëtar “King Khalid” të Riadit në momentin e sulmit të regjistruar më 11 tetor. Ai po udhëtonte drejt Shqipërisë kur një predhë goditi terminalin e pasagjerëve.

Nga sulmi humbi jetën një person dhe u plagosën 11 të tjerë. Autoritetet saudite bënë të ditur se predha goditi Terminalin 4 dhe shkaktoi zjarr. Viktima raportohet se ishte një shtetas pakistanez.

Nuk raportohet që Shabani të ketë pësuar dëmtime. Tekniku shqiptar punon aktualisht në Arabinë Saudite te Jubah dhe ishte nisur drejt vendit tonë.

Ngjarja ndodhi vetëm një ditë pas sulmit të rëndë të 10 tetorit në të njëjtin aeroport, ku humbën jetën të paktën 12 persona dhe u plagosën më shumë se 300. Bilanci më pas u rrit pas vdekjes së një prej të plagosurve.

Huthët e Jemenit morën përgjegjësinë për sulmet dhe deklaruan se kishin përdorur raketa e dronë kundër objektivave në Arabinë Saudite. Ata paralajmëruan se aeroportet e vendit mund të goditen përsëri, me përjashtim të atyre në Mekë dhe Medinë.

Shabani ka punuar më parë në futbollin shqiptar dhe eksperienca e tij e fundit si trajner ishte te Luftëtari. Krahas angazhimit në Arabinë Saudite, ai po ndjek edhe kursin për licencën UEFA Pro në Shqipëri.