Vllaznia e vajzave, skuadra që ka dominuar futbollin shqiptar për më shumë se një dekadë, rrezikon të shkrihet. Paralajmërimi ka ardhur nga vetë trajneri Nikolin Leka, pas humbjes 0-3 ndaj Apolonisë në Shkodër.
Tekniku nuk e fshehu shqetësimin për situatën që po kalon klubi, duke pranuar se problemet jashtë fushës, largimet e futbollisteve dhe rezultatet e dobëta kanë vënë në pikëpyetje vazhdimësinë e ekipit.
“Ndoshta i erdhi edhe fundi dominimit të Vllaznisë”, deklaroi Leka, duke lënë të hapur edhe mundësinë e një vendimi drastik për të ardhmen e skuadrës.
Humbja me Apoloninë, Leka: Kështu nuk vazhdohet më
Disfata 0-3 në shtëpi ndaj Apolonisë ka thelluar problemet e Vllaznisë, që tashmë ka të njëjtin numër pikësh me Partizanin e vendit të katërt.
Pas ndeshjes, trajneri Nikolin Leka pranoi se skuadra nuk ishte në nivelin e duhur dhe se situata kishte arritur në një pikë kritike.
“Një ndeshje aspak e mirë. Nuk duhej të shkonte kështu. Ne e kemi thënë edhe në intervista të tjera. Situatat erdhën deri këtu. Të shohim ditët në vazhdim”, u shpreh ai.
Më tej, tekniku pranoi se problemet janë grumbulluar prej kohësh dhe se përgjegjësia nuk i takon vetëm një personi.
“Kështu nuk vazhdohet më. Është diçka që nuk shtyhet. Ndoshta i erdhi edhe fundi dominimit të Vllaznisë. Këtu faje, po i marr vetë fajet i pari sepse jam trajneri, faj kemi të gjithë. Çdo fillim e ka një fund”, deklaroi Leka.
“Mund të shkrihet Vllaznia”, paralajmërimi i trajnerit
Deklarata më e fortë e trajnerit lidhej me të ardhmen e vetë ekipit.
“Normalisht, edhe ekipi do të shkrihet. Mund të shkrihet. Nuk është ndonjë çudi e madhe sepse situatat nuk kanë qenë aspak të mira”, tha Leka.
Trajneri bëri të ditur se do të zhvillojë një takim me drejtuesit për të diskutuar vazhdimësinë e skuadrës.
“Do ulem me drejtuesit që t’i bisedojmë gjërat më mirë se si mund të shkojnë”, shtoi ai.
Për momentin, nuk ka një vendim zyrtar për shkrirjen e Vllaznisë së vajzave. Deklaratat e Lekës përbëjnë një paralajmërim serioz për gjendjen e klubit.
Pesë futbolliste të larguara, problemet jashtë fushës ndikojnë te rezultatet
Sipas trajnerit, vështirësitë e Vllaznisë nuk lidhen vetëm me paraqitjet në kampionat.
Leka theksoi se problemet jashtë fushës kanë ndikuar drejtpërdrejt në përgatitjen, përbërjen dhe performancën e skuadrës.
“Situatat nuk kanë qenë të mira jashtë fushe. Normalisht që ndikojnë brenda fushës, te largimet dhe performancat e lojtareve. Normalisht edhe te performanca ime si trajner”, deklaroi ai.
Tekniku zbuloi gjithashtu se ekipi ka humbur të paktën pesë futbolliste.
“Nuk kam çfarë bëj kur nuk kam lojtaret e duhura. Janë larguar pesë lojtare të paktën”, u shpreh Leka.
Ai nuk dha hollësi mbi natyrën e problemeve jashtë fushës, duke theksuar se fillimisht do t'i diskutojë ato me drejtuesit e klubit.
Ndeshja me Partizanin në dyshim, Leka pret takimin me drejtuesit
Vllaznia ka në kalendar përballjen me Partizanin, por trajneri nuk ishte në gjendje të fliste me siguri për vazhdimësinë e skuadrës.
“Ndeshja e radhës është me Partizanin, por nuk e mendoj atë pjesë. Varet në vazhdim si do vijnë situatat. Mund të shkrihet Vllaznia”, deklaroi ai.
Këto fjalë tregojnë pasigurinë që ka përfshirë ekipin, ndërsa pritet të mësohet nëse drejtuesit do të marrin masa për të ndryshuar situatën.
13 tituj radhazi dhe përballja me Real Madridin, rrezikohet një histori suksesi
Vllaznia e vajzave është një nga skuadrat më të suksesshme në historinë e futbollit shqiptar.
Shkodranet kanë fituar 13 tituj kampionë radhazi, duke vendosur një dominim të gjatë në kampionatin vendas.
Skuadra ka përfaqësuar Shqipërinë edhe në arenën europiane, ku ka arritur të luajë në fazën e grupeve të Ligës së Kampioneve për femra, përfshirë përballjet me Real Madridin.
Por ky sezon ka sjellë një situatë të pazakontë për klubin, që tashmë nuk gëzon epërsinë e viteve të mëparshme.
Humbja ndaj Apolonisë dhe deklaratat e Nikolin Lekës kanë ngritur pikëpyetje për të ardhmen e një prej projekteve më të suksesshme të futbollit të femrave në Shqipëri.
Vendimtare pritet të jenë bisedimet mes trajnerit dhe drejtuesve, nga të cilat mund të përcaktohet vazhdimësia e ekipit.




