UEFA ka gjobitur Federatën e Futbollit të Kosovës me 35 mijë euro për incidentet e regjistruara gjatë ndeshjes kundër Austrisë në Ligën e Kombeve.
Masat lidhen me shfaqjen e një banderole me mesazh të papërshtatshëm dhe me sjellje të cilësuara raciste ose diskriminuese. Takimi u zhvillua më 27 shtator dhe përfundoi me fitoren 3-1 të Austrisë.
Dy gjoba për FFK-në
Federata e Futbollit të Kosovës është gjobitur me 15 mijë euro për shfaqjen e një mesazhi të papërshtatshëm për një aktivitet sportiv. Vendimi është mbështetur në nenin 16, pika 2, shkronja “e” të Rregullores Disiplinore të UEFA-s.
Një tjetër gjobë prej 20 mijë eurosh është vendosur për sjellje raciste ose diskriminuese të tifozëve, bazuar në nenin 14 të rregullores.
Ndalimi i tifozëve pezullohet për dy vite
Përveç gjobës, UEFA ka urdhëruar FFK-në që të mos u shesë bileta tifozëve të Kosovës për një ndeshje në transfertë në kompeticionet e ekipeve kombëtare.
Kjo masë nuk do të zbatohet menjëherë, pasi është pezulluar për një periudhë prove dyvjeçare. Nëse gjatë kësaj kohe regjistrohen shkelje të ngjashme, Kosova rrezikon ta vuajë dënimin dhe të luajë një transfertë pa mbështetjen e tifozëve të saj.




