Vedat Muriqi do të jetë kapiteni i ri i përfaqësueses së Kosovës. Vendimin e konfirmoi trajneri Franco Foda gjatë konferencës për shtyp përpara ndeshjes kundër Irlandës.
Sulmuesi do ta marrë shiritin pas largimit të Amir Rrahmanit, i cili vendosi të tërhiqet nga përfaqësuesja. Mërgim Vojvoda do të jetë zëvendëskapiteni i ekipit.
“Kapiteni i Kosovës do të jetë Vedat Muriqi. Këtë e kemi diskutuar edhe me lojtarët. Kapiteni i dytë do të jetë Mërgim Vojvoda”, deklaroi Foda.
Trajneri foli edhe për objektivat e Kosovës në Ligën e Kombeve. Ai e cilësoi Austrinë si favoriten kryesore të grupit, ndërsa theksoi se synimi fillestar është qëndrimi në Ligën B.
“Na presin ndeshje të vështira dhe dihet se Austria është favorite në këtë grup. Ne kemi objektiva të larta. Fillimisht dëshirojmë të qëndrojmë në Ligën B, ndërsa më pas, nëse paraqitemi mirë, të provojmë të ngjitemi më lart”, tha tekniku gjerman.
Foda: Jemi gati për Irlandën
Foda vlerësoi edhe përshtatjen e futbollistëve të rinj që i janë bashkuar skuadrës. Sipas tij, lojtarët me më shumë përvojë i kanë ndihmuar ata të integrohen shpejt në grup.
“Kemi lojtarë shumë të mirë, të cilët i kanë pritur siç duhet të rinjtë. Nuk kemi pasur shumë kohë, por kemi punuar mirë si në fazën me top, ashtu edhe kur nuk e kemi atë. Besoj se jemi përgatitur mirë për ndeshjen ndaj Irlandës”, shtoi ai.
Menaxheri i përfaqësueses, Bajram Shala, konfirmoi se dokumentacioni i Erblin Osmanit dhe Dion Kaçurit është në rregull. Të dy futbollistët mund të aktivizohen, ndërsa vendimi përfundimtar do t’i takojë trajnerit.




