Vllaznia ka arritur marrëveshjen me Andi Hadrojn, duke siguruar përforcimin e parë që prej ardhjes së trajnerit Csaba Laszlo në krye të skuadrës. Mbrojtësi 27-vjeçar do të jetë pjesë e kuqebluve, duke shtuar alternativat në krahun e djathtë të prapavijës.
Futbollisti i Kombëtares shqiptare ishte pranë transferimit te Dinamo rreth një muaj më parë, por marrëveshja dështoi në momentet e fundit. Shkak u bë kohëzgjatja e kontratës, për të cilën palët nuk arritën të gjenin gjuhën e përbashkët.
Pas negociatave të pasuksesshme me blutë e kryeqytetit, Hadroj ka zgjedhur të vazhdojë karrierën në Shkodër, ku do të vihet nën urdhrat e trajnerit Laszlo.
Eksperienca e fundit e mbrojtësit ishte në Ukrainë, me skuadrën e Polissya, ndërsa pjesën më të madhe të karrierës e ka kaluar te Partizani.
Me fanellën e të kuqve, Hadroj ka regjistruar 111 paraqitje, duke fituar përvojë në kampionatin shqiptar.
Transferimi i tij pritet t'i japë më shumë siguri krahut të djathtë të mbrojtjes së Vllaznisë, që synon të përmirësojë rezultatet pas një fillimi të vështirë të sezonit.




