TË FUNDIT
Kthehu te lajmet
Kategoria Superiore

Vllaznia humbet çështjen në FIFA, mbi 11 mijë euro detyrim dhe 2 mijë dollarë gjobë

Vllaznia ka humbur çështjen financiare me ish-futbollistin Amir Kahrimanoviç.

Vllaznia humbet çështjen në FIFA, mbi 11 mijë euro detyrim dhe 2 mijë dollarë gjobë

Vllaznia ka humbur çështjen financiare me ish-futbollistin Amir Kahrimanoviç. Dhoma e Zgjidhjes së Mosmarrëveshjeve në FIFA ka vendosur që klubi shkodran t’i paguajë lojtarit 11.499 euro neto, të shoqëruara me interes vjetor prej 5 për qind.

Shuma përfaqëson detyrimet e papaguara për prillin, majin dhe qershorin e vitit 2025. Për shkak se kjo konsiderohet shkelja e tretë e klubit brenda dy viteve, FIFA ka vendosur edhe një gjobë prej 2.000 dollarësh.

Tri paga të papaguara

Kahrimanoviç kishte kontratë me Vllazninë për sezonin 2024/25. Marrëveshja parashikonte një pagesë mujore prej 3.833 eurosh neto, e ndarë në 2.500 euro pagë dhe 1.333 euro dietë.

Pas përfundimit të bashkëpunimit, futbollisti iu drejtua FIFA-s me pretendimin se nuk kishte marrë pagesat e tre muajve të fundit. Kërkesa e tij për shumën 11.499 euro u pranua plotësisht.

FIFA nuk pranon provën për pagesën e prillit

Vllaznia pretendoi se detyrimi i muajit prill ishte shlyer në dorë dhe paraqiti një mandat arkëtimi për ta provuar pagesën.

Dokumenti nuk u mor parasysh sepse nuk ishte përkthyer në një nga gjuhët zyrtare të përdorura në procedurat e FIFA-s. Për pasojë, klubi nuk arriti ta provonte pagesën sipas kërkesave procedurale.

Kontrata vlente deri më 30 qershor

Klubi argumentoi gjithashtu se Kahrimanoviç duhej paguar vetëm deri më 12 maj 2025, kur Vllaznia zhvilloi ndeshjen e fundit të sezonit.

FIFA iu referua të dhënave të regjistruara në sistemin TMS, ku përfundimi zyrtar i sezonit dhe i marrëdhënies kontraktuale figuronte më 30 qershor. Mbyllja më e hershme e ndeshjeve nuk e ndryshonte detyrimin financiar të klubit.

Për këtë arsye, Vllaznia duhet të paguajë të plota detyrimet për prillin, majin dhe qershorin.

Rrëzohet pretendimi për penalitetin

Vllaznia kërkoi që nga detyrimi të zbriteshin 4.000 euro, bazuar në një klauzolë për moskthimin e pronës dhe pajisjeve të klubit.

Edhe kjo kërkesë u rrëzua. FIFA e konsideroi penalitetin joproporcional, ndërsa klubi nuk paraqiti një inventar të plotë që të përcaktonte pajisjet e pakthyera dhe vlerën e tyre.

Vendimi përfundimtar e detyron Vllazninë t’i paguajë Kahrimanoviçit 11.499 euro, së bashku me interesin prej 5 për qind që llogaritet nga datat përkatëse të maturimit. Gjoba prej 2.000 dollarësh është detyrim i veçantë dhe duhet t’i paguhet FIFA-s.