Vllaznia hedh një hap të rëndësishëm drejt së ardhmes. Klubi shkodran ka prezantuar projektin “Vllaznia Elite Campus”, një kompleks sportiv që do të ndërtohet në një sipërfaqe prej rreth 70 mijë metrash katrorë në Omaraj të Malësisë së Madhe.
Përmes një njoftimi zyrtar, kuqeblutë kanë zbuluar detajet e investimit, i cili përfshin fusha futbolli, një stadium të ri dhe ambiente të posaçme për përgatitjen e sportistëve.
Zona ku do të zhvillohet projekti ndodhet vetëm 10 minuta larg Shkodrës, ndërsa klubi synon ta kthejë kompleksin në një qendër të rëndësishme për zhvillimin e futbollit në rajon.
Katër fusha futbolli dhe stadium modern, projekti me dy faza
Sipas njoftimit të Vllaznisë, ndërtimi i kompleksit është planifikuar të realizohet në dy faza.
Faza e parë parashikon krijimin e katër fushave të futbollit, tri me bar natyral dhe një me sipërfaqe sintetike. Kjo pjesë e projektit do të zhvillohet në bashkëpunim me Federatën Shqiptare të Futbollit.
Ndërkohë, faza e dytë përfshin ndërtimin e një stadiumi modern me kapacitet rreth 3 mijë spektatorë.
Projekti parashikon gjithashtu ambiente sportive multifunksionale, një kompleks hotelier, qendër përgatitjeje dhe rikuperimi, SPA dhe pishinë.
Infrastruktura do të krijojë mundësi edhe për organizimin e grumbullimeve sportive ndërkombëtare.
Alban Xhaferi zbulon ambiciet për të ardhmen
Presidenti i Vllaznisë, Alban Xhaferi, e ka cilësuar projektin si një investim afatgjatë, që synon të krijojë kushte më të mira për zhvillimin e klubit dhe akademisë.
Në një intervistë për Zyrën e Marrëdhënieve me Publikun dhe Marketingut të klubit, Xhaferi ka folur për vizionin e tij, bashkëpunimet ndërkombëtare dhe rëndësinë e infrastrukturës për brezat e ardhshëm.
“Me këtë projekt nuk po investojmë vetëm për Vllazninë e sotme, por për Vllazninë e gjeneratave të ardhshme”, është shprehur presidenti i kuqebluve.
Klubi e ka prezantuar “Vllaznia Elite Campus” si një projekt historik, me synimin për të krijuar një bazë moderne stërvitore dhe për t'u ofruar futbollistëve të rinj kushte më të mira për zhvillimin e tyre.
Ende nuk janë bërë të ditura afatet e përfundimit të punimeve apo vlera financiare e investimit.




