Vllaznia vazhdon ndryshimet në stafin teknik. Vetëm pak kohë pas fitores 2-0 ndaj Tiranës në stadiumin “Loro Boriçi”, klubi shkodran ka njoftuar zyrtarisht përfundimin e bashkëpunimit me zëvendëstrajnerin Ergi Borshi.
Vendimi vjen në kuadër të riorganizimit të pankinës kuqeblu, pas emërimit të trajnerit hungarez Csaba Laszlo në vend të Edi Martinit.
Borshi ishte larguar nga skuadra gjatë javës, por konfirmimi zyrtar nga klubi erdhi vetëm pas përfundimit të përballjes me bardheblutë.
Vllaznia konfirmon ndarjen me Ergi Borshin
Përmes një njoftimi në rrjetet sociale, klubi shkodran bëri të ditur se bashkëpunimi me ish-zëvendëstrajnerin është mbyllur me mirëkuptim.
“KF Vllaznia bën të ditur se ka mbyllur me mirëkuptimin bashkëpunimin me zëvendëstrajnerin Ergi Borshi.
E falenderojmë për kontributin e dhënë gjatë këtyre viteve për klubin dhe i urojmë suksese në karrierën e tij të mëtejshme si trajner”, thuhet në komunikatën zyrtare.
Largimi i Borshit shënon një tjetër ndryshim në strukturën teknike të Vllaznisë, që po hyn në një fazë të re nën drejtimin e Laszlos.
Ndërkohë, për Vioresin Sinanin, emri i të cilit është përmendur gjithashtu në lidhje me ndryshimet në staf, ende nuk ka pasur një komunikim zyrtar nga klubi.
Borshi mohon kalimin te Shiroka
Menjëherë pas largimit nga Vllaznia, emri i Ergi Borshit u lidh me një kalim të mundshëm te Shiroka, skuadër që garon në Kategorinë e Dytë.
Megjithatë, vetë trajneri i ka mohuar këto zëra, duke përjashtuar për momentin mundësinë e marrjes së drejtimit të kësaj skuadre.
Me largimin e tij, Vllaznia vijon riorganizimin e stafit pas ndryshimit të trajnerit të parë. Ndërkohë, skuadra vjen nga një rezultat pozitiv në kampionat, ku mposhti Tiranën 2-0 në Shkodër.




