Csaba László është trajneri i ri i Vllaznisë. Klubi shkodran ka zgjedhur teknikun 62-vjeçar për të pasuar Edi Martinin dhe për të nxjerrë skuadrën nga momenti i vështirë në kampionat.
Kuqeblutë e prezantuan Lászlón përmes një postimi në rrjetet sociale, ku trajneri shfaqej përkrah presidentit Alban Xhaferi. Për të nis kështu një kapitull i ri në një pankinë ku kërkohen rezultate të menjëhershme.
“Eksperiencë. Personalitet. Ambicie. Një kapitull i ri fillon në Shkodër. Mirë se erdhe, Mister!”, shkroi Vllaznia në njoftimin e saj.
Kush është Csaba László?
László ka lindur më 13 shkurt 1964 në Odorheiu Secuiesc të Rumanisë dhe ka ndërtuar një karrierë të gjatë si trajner në disa vende.
Ai ka drejtuar përfaqësueset e Ugandës dhe Lituanisë, ndërsa ka qenë edhe ndihmës i Lothar Matthäus në Kombëtaren hungareze. Në nivel klubesh ka punuar me Ferencvárosin, Hearts, Charleroi, MTK Budapestin, Dunajská Stredën, Dundee United, Chennaiyin dhe Sepsi OSK.
Pjesë e eksperiencës së tij është edhe puna në futbollin gjerman, ku ka drejtuar ekipin e dytë dhe skuadrat e moshave të Borussia Mönchengladbachut.
Ndalesa e fundit në pankinë ishte te Sepsi OSK në vitin 2025. László e mori skuadrën në fundin e sezonit, por nuk arriti ta shmangte rënien nga elita rumune.
Dy herë “Trajneri i Vitit”
Një nga periudhat më të mira të karrierës së Lászlós ishte ajo te Ferencvárosi. Puna me klubin hungarez dhe paraqitjet në Europë i siguruan çmimin “Trajneri i Vitit” në Hungari për sezonin 2003/04.
Suksesi më i madh individual jashtë Hungarisë erdhi në vitin 2009. Pas një sezoni pozitiv me Hearts, ai u shpall “Trajneri i Vitit” në Skoci nga Shoqata e Gazetarëve të Futbollit.
Tekniku njihet për një qasje pragmatike dhe ka përdorur shpesh skemën 4-2-3-1 gjatë karrierës së tij.
Werner Bürger pritet të jetë krahu i tij i djathtë
Në stafin e Lászlós pritet të përfshihet edhe Werner Bürger në rolin e zëvendëstrajnerit. Tekniku gjerman e njeh mirë metodën e punës së tij, pasi të dy kanë bashkëpunuar më parë te Hearts, MTK Budapest, Dunajská Streda dhe Dundee United.
Bürger ka mbajtur edhe rolin e trajnerit të parë për një periudhë të shkurtër te Csíkszereda. Prania e tij do ta ndihmonte Lászlón të ndërtonte më shpejt stafin dhe mënyrën e re të punës në Shkodër.
Debutimi ndaj Dinamos
Trajneri i ri merr një Vllazni që ndodhet në vendin e fundit pas pesë javësh, me vetëm dy pikë. Detyra e parë është stabilizimi i skuadrës dhe largimi nga zona e fundit, përpara se të mendohet për objektiva si kualifikimi në Europë.
Debutimi i Lászlós do të vijë ndaj Dinamo Cityt në stadiumin “Loro Boriçi”. Ndeshja e javës së gjashtë është planifikuar për më 10 tetor, në orën 18:30.
Pushimi i kampionatit i jep trajnerit kohë për të njohur grupin dhe për të vendosur idetë e para taktike. Për lojtarët që kanë pasur pak minuta deri tani, ndryshimi në pankinë përfaqëson një mundësi të re për të bindur stafin teknik.
Sfida ndaj Dinamos do të japë sinjalet e para për drejtimin që do të marrë Vllaznia nën udhëheqjen e Csaba Lászlós.




