Nelson Hysa do të zhvillojë ndeshjen më të rëndësishme të karrierës së tij. Boksieri shqiptar do të përballet me Agit Kabayelin më 28 nëntor 2026 në “Merkur Spiel-Arena” të Dyseldorfit, me titullin botëror WBC në peshat e rënda në lojë.
Dueli përkon me Ditën e Pavarësisë së Shqipërisë, një simbolikë që Hysa kërkon ta shndërrojë në motivim shtesë përballë kampionit të botës.
Kabayel do të zhvillojë mbrojtjen e parë të titullit të plotë WBC, të cilin e mori pasi Oleksandr Usyk hoqi dorë nga brezi në muajin qershor. Ndeshja do të transmetohet drejtpërdrejt në DAZN.
Hysa kërkon mbështetjen e shqiptarëve
Pas zyrtarizimit, Hysa iu drejtua tifozëve shqiptarë me një mesazh të veçantë. Ai i falënderoi për mbështetjen gjatë gjithë karrierës dhe i ftoi të jenë të pranishëm në Dyseldorf.
“Do të përballem me një kampion bote si Agit Kabayel, në një ndeshje për titullin e peshave të rënda. Të parët që dua të falënderoj jeni ju, që më keni mbështetur gjatë gjithë karrierës”, u shpreh boksieri shqiptar.
Hysa tha se synon ta kthejë mbrëmjen e madhe të boksit në një festë shqiptare dhe të sjellë titullin botëror në vend.
“Me ndihmën e Zotit dhe mbështetjen tuaj, shpresoj të marrim një fitore të madhe dhe ta sjellim në Shqipëri titullin që na mungon”, deklaroi ai.
Në mesazhin e publikuar, Hysa përmendi 29 nëntorin, por data zyrtare e duelit është 28 nëntori.
Premtimi për Kabayelin
Boksieri shqiptar kishte edhe një paralajmërim për kundërshtarin dhe stafin e tij. Ai premtoi se “Merkur Spiel-Arena” do të mbushet me mbështetës kuqezi, pavarësisht se Kabayel do të boksojë pranë publikut të tij.
“Të jenë gati, sepse stadiumi do të mbushet me shqiptarë. Ua premtoj këtë”, deklaroi Hysa.
Kabayel vjen në këtë përballje me 27 fitore në po kaq ndeshje, 19 prej tyre me nokaut. Hysa është gjithashtu i pamposhtur, me 25 fitore dhe 23 nokaut. Për shqiptarin, ky duel përfaqëson kalimin e parë në nivelin më të lartë të kategorisë së rëndë.
Më 28 nëntor, përpara rreth 60 mijë spektatorëve në Dyseldorf, Hysa do të kërkojë të shkruajë kapitullin më të madh të karrierës së tij dhe një nga faqet më të rëndësishme të boksit shqiptar.




