TË FUNDIT
Kthehu te lajmet
Kategoria Superiore

Conference League/ Egnatia sfidon Craiovan, kërkon fitoren e parë

Egnatia rikthehet në arenën europiane.

Conference League/ Egnatia sfidon Craiovan, kërkon fitoren e parë

Egnatia rikthehet në arenën europiane, ku më 5 nëntor do të përballet me Universitatea Craiova në transfertë, në ndeshjen e tretë të fazës së ligës në Conference League.

Takimi do të zhvillohet në stadiumin “Ion Oblemenco”, duke nisur nga ora 21:00. Kampionët e Shqipërisë synojnë të zgjasin serinë pozitive në Europë dhe të hedhin një tjetër hap në këtë kompeticion.

Dy barazime në Europë, Egnatia kërkon fitoren e parë

Skuadra e drejtuar nga Nevil Dede ka treguar se mund të konkurrojë edhe përballë kundërshtarëve me përvojë në arenën ndërkombëtare.

Në dy ndeshjet e para të fazës së ligës, rrogozhinasit kanë regjistruar dy barazime ndaj skuadrave daneze Midtjylland dhe Aarhus.

Këto rezultate i kanë siguruar Egnatias dy pikë në renditjen e Conference League, duke mbajtur të hapura ambiciet për vazhdimësinë e rrugëtimit europian.

Tashmë, objektivi është fitorja e parë në këtë fazë të kompeticionit, megjithëse përballë do të jetë një kundërshtar që luan në shtëpi.

Universitatea Craiova, prova e radhës për kampionët

Transferta në Rumani përfaqëson një tjetër test të rëndësishëm për Egnatian, e cila po përballon një kalendar të ngjeshur mes kampionatit shqiptar dhe Conference League.

Rrogozhinasit kryesojnë Abissnet Superiore me 24 pikë pas dhjetë javësh, duke konfirmuar formën e mirë edhe në garën vendase.

Në Europë, skuadra ka treguar disiplinë dhe aftësi për të marrë rezultate përballë rivalëve të fortë.

Përballja me Universitatea Craiova do të jetë një mundësi tjetër për të dëshmuar progresin e kampionëve shqiptarë dhe për të shtuar pikët në renditjen e fazës së ligës.

Egnatia me mungesa, por me Bitrin në dispozicion

Trajneri Nevil Dede ka udhëtuar drejt Rumanisë me një kontingjent prej 20 futbollistësh, mes tyre tre portierë.

Ildi Gruda, autor i dy golave të Egnatias në dy ndeshjet e para europiane, nuk është rikuperuar nga dëmtimi i pësuar ndaj Tiranës dhe do të mungojë.

Jashtë mbetet edhe Eljon Sota, ndërsa Ledio Beqja është përfshirë në listën europiane në vend të tij.

Lajmi pozitiv është rikuperimi i Eneo Bitrit. Mbrojtësi, i cili u largua i dëmtuar nga fusha në ndeshjen ndaj Tiranës, është në dispozicion të stafit teknik.

Pavarësisht mungesave, Egnatia do të kërkojë një tjetër rezultat pozitiv në Rumani, me synimin për të vazhduar ecurinë pa humbje në fazën e ligës.

Universitatea Craiova-Egnatia luhet më 5 nëntor, në orën 21:00, në stadiumin “Ion Oblemenco”.