TË FUNDIT
Kthehu te lajmet
Kategoria Superiore

Dy penallti, gol i anuluar dhe karton i kuq, Jorgji kalon testin në Teuta-Skënderbeu

Arbitri Enea Jorgji u përball me disa episode të vështira në ndeshjen Teuta-Skënderbeu.

Dy penallti, gol i anuluar dhe karton i kuq, Jorgji kalon testin në Teuta-Skënderbeu

Arbitri Enea Jorgji u përball me disa episode të vështira në ndeshjen Teuta-Skënderbeu. Dy penallti, një gol i anuluar dhe një karton i kuq ndikuan drejtpërdrejt në zhvillimin e takimit.

Pamjet filmike tregojnë se vendimet përfundimtare të arbitrit ishin të sakta. Në rastin e penalltisë së Skënderbeut ishte e nevojshme ndërhyrja e VAR-it.

Penalltia e Teutës

Në minutën e 14-të, Jazxhi u pengua brenda zonës nga Drame. Futbollistët e Skënderbeut kundërshtuan vendimin, por pamjet treguan se mbrojtësi ndërhyri në mënyrë të parregullt.

Jorgji akordoi penallti për Teutën, të cilën Kallaku e shndërroi në gol dy minuta më vonë. Vendimi ishte i drejtë.

VAR-i korrigjon arbitrin

Në minutën e 58-të, Jazxhi shkaktoi faull ndaj Bismarkut brenda zonës. Jorgji fillimisht lejoi vazhdimin e lojës, por u thirr nga VAR-i për ta rishikuar episodin.

Pas kontrollit të pamjeve, arbitri akordoi penallti për Skënderbeun. Kontakti ishte i parregullt dhe ndërhyrja e VAR-it ishte e saktë.

Pse u anulua goli i Zenullarit

Bernardoni priti penalltinë e Bismarkut në minutën e 60-të. Topi i kthyer përfundoi te Zenullari, i cili e dërgoi në rrjetë.

Goli u anulua sepse futbollisti i Skënderbeut kishte hyrë në zonë përpara ekzekutimit të penalltisë. Pamjet e konfirmuan shkeljen dhe vendimi ishte i drejtë.

I saktë edhe kartoni i kuq

Në minutën e 73-të, Muço Boçi u përjashtua për një reagim antisportiv ndaj mesfushorit Drame. Jorgji i tregoi direkt kartonin e kuq, duke e lënë Teutën me dhjetë lojtarë.

Edhe ky vendim ishte i saktë. Pavarësisht numrit të lartë të episodeve, arbitri e mbylli ndeshjen pa gabime vendimtare.