Egnatia ka regjistruar një tjetër rezultat të rëndësishëm në Ligën e Konferencës, duke barazuar 1-1 në transfertë ndaj Aarhusit në Danimarkë. Përveç pikës së fituar, kampionët e Shqipërisë kanë arritur një rezultat që, sipas “Panorama Sport”, nuk ishte regjistruar më parë nga Skënderbeu gjatë pjesëmarrjeve në fazën e grupeve të Ligës së Europës.
Skuadra korçare, e cila për vite me radhë përfaqësoi futbollin shqiptar në arenën ndërkombëtare, nuk arriti të merrte asnjë pikë në ndeshjet jashtë fushe gjatë fazës së grupeve. Ndërkohë, Egnatia e ka siguruar pikën e parë në transfertë që në përballjen e saj të parë jashtë Shqipërisë në këtë fazë të Ligës së Konferencës.
Ekipi nga Rrogozhina ka grumbulluar dy pikë pas dy ndeshjeve të para, duke regjistruar dy barazime identike, 1-1, kundër Midtjyllandit dhe Aarhusit.
Protagonist në të dyja takimet ka qenë Ildi Gruda, i cili ka shënuar golat e Egnatias, duke dhënë një kontribut vendimtar në rezultatet e deritanishme të kampionëve.
Pas dy përballjeve me skuadrat daneze, Egnatian e pret një tjetër transfertë europiane. Më 5 nëntor, në orën 21:00, rrogozhinasit do të luajnë në Rumani kundër Universitatea Craiovës, ku do të kërkojnë të vazhdojnë ecurinë pozitive në kompeticion.




