TË FUNDIT
Kthehu te lajmet
Kategoria e Parë

Kategoria e Parë/ Pogradeci ngec, Kukësi fiton, Alidema bën poker

Java e tetë e Kategorisë së Parë ka sjellë rezultate të papritura.

Kategoria e Parë/ Pogradeci ngec, Kukësi fiton, Alidema bën poker

Java e tetë e Kategorisë së Parë ka sjellë rezultate të papritura dhe zhvillime interesante në garën për ngjitjen në Superiore. Pogradeci është ndalur në shtëpi nga Oriku, ndërsa Bylisi dhe Besa kanë ndarë pikët në përballjen direkte mes dy skuadrave pretendente.

Ndërkohë, Kukësi dhe Korabi kanë marrë fitore të rëndësishme, kurse Besëlidhja ka dhuruar spektakël me shtatë gola në takimin ndaj Sopotit.

Pogradeci befasohet nga Oriku, Bylisi dhe Besa ndajnë pikët

Surpriza më e madhe e javës erdhi nga Pogradeci, ku skuadra vendase nuk shkoi përtej barazimit 0-0 kundër Orikut.

Liqenorët nuk arritën të shfrytëzonin avantazhin e fushës përballë ekipit që mbyll renditjen dhe që deri në këtë javë kishte regjistruar vetëm humbje.

Për Orikun, kjo ishte pika e parë e sezonit, ndërsa për Pogradecin një hap fals në garën për objektivat e tij.

Pa fitues përfundoi edhe dueli mes Bylisit dhe Besës. Dy skuadrat, që synojnë ngjitjen në elitën e futbollit shqiptar, u ndalën në një barazim pa gola, duke marrë nga një pikë.

Kukësi dhe Korabi marrin fitore me peshë

Kukësi ka siguruar tri pikë të rëndësishme përballë Kastriotit, duke triumfuar minimalisht 1-0.

Goli vendimtar u realizua nga De Matos Rodrigez në minutën e 58-të. Kjo fitore i jep një tjetër shtysë skuadrës verilindore në garën për vendet që çojnë drejt Superiores.

Me të njëjtin rezultat fitoi edhe Korabi, që mposhti Burrelin në shtëpi. Morina ishte autori i golit të vetëm të takimit, të shënuar në minutën e 74-t.

Besëlidhja shënon pesë gola, Alidema protagonist absolut

Ndeshja më spektakolare e javës u zhvillua mes Besëlidhjes dhe Sopotit, me lezhjanët që triumfuan 5-2.

Protagonisti i padiskutueshëm ishte Alidema, i cili realizoi katër gola në minutat 40, 55, 64 me penallti dhe 79.

Golin e pestë për Besëlidhjen e shënoi Akansase në minutën e dytë shtesë, ndërsa për Sopotin të dy golat mbajtën firmën e Aminut, në minutat 23 dhe 76.

Rezultatet e javës së 8-të në Kategorinë e Parë

  • Kukësi 1-0 Kastrioti
    58' De Matos Rodrigez

  • Korabi 1-0 Burreli
    74' Morina

  • Bylis 0-0 Besa

  • Besëlidhja 5-2 Sopoti
    40', 55', 64' (pen.), 79' Alidema, 90+2' Akansase / 23', 76' Aminu

  • Pogradeci 0-0 Oriku