Pogradeci po konfirmon ambiciet për t’u rikthyer në “Abissnet Superiore”. Fitorja 2-0 ndaj Korabit në transfertë e ka ngjitur skuadrën liqenore në krye të Kategorisë së Parë.
Pas pesë javësh, ekipi i drejtuar nga Emiljano Çela numëron 11 pikë, një më shumë se Besa, që mbetet ndjekësja më e afërt.
Klubi pogradecar publikoi në rrjetet sociale renditjen aktuale, duke vendosur në qendër pozicionin e parë. Postimi pasqyron besimin e krijuar brenda skuadrës dhe synimin e qartë për të luftuar deri në fund për ngjitjen në elitë.
Rezultatet e para tregojnë një Pogradec të qëndrueshëm, që nuk dëshiron të humbasë ritmin. Megjithatë, diferencat në krye mbeten të vogla dhe çdo ndeshje mund të ndikojë në klasifikim.
Pogradeci do të rikthehet në fushë më 17 tetor, kur do të presë Sopotin në stadiumin “Gjorgji Kyçyku”. Takimi do të nisë në orën 13:30.




